Hoi zäme.

Ech be d' Stella Sabina Burch. Ech be am 3. Jänner 2012 of d Welt cho.

Ech be e chli früh gseh i de 33. Woche. (Miis Mami hed au fast 10 Woche met mer em Spetal müssel liege.) Aber ech bene Kämpferi.

Ech ha scho em Buch ene emmer omeponget. Denn hend mer d' Aerzt am Obig am 21.02 of d Wält gholfe. Ech wiege 1800 Gramm ond ech be 39 cm chli.

Jetzt beni e de IMC z Lozärn. Do muess i jetzt legge ond wachse. Ech cha scho schnuufe ohni Suurstoffhelf, doch tuends mi öberwache. Em Momänt schloofi fascht de ganz Tag.

De Papi hed natürlech scho muesse fötele, drom mol erschti Belder vo mer. .

 

Ciao a tutti

io sono Stella Sabina Burch

dopo un parto prematuro sono nata il 3. gennaio 2012 alle ore 21.02 nella 33. settimana

peso 1800 grammi

mi hanno misurato loro  - 39cm

la mia mammina é stata 10 settimane al ospedale senza potersi alzare dal letto

Nel pancione di mammina tiravo molti calci

Ora sto al ospedale per bambini di lucerna

devo rimanere un po qui nel lettino per crescere un altro po

naturalmente il mio papi mi ha fatto gia le mie prime foto

guarda!

 

 

Do beni öpe 5 Minute alt. Noch chli ond verdrückt.

 

ech ha scho schöni Fenger ond Fengernägel.

 

so nätt ben ech agschriebe worde. Ond of de Babygalerie vom Kantonsspetal beni auch drofe

Donnerstag, 5. Januar 2011

Hött hani scho mini erschti Reis gmacht. Ech be vom Kispi id IMC zöglet. Jetzt beni ganz nöch bem Mami. Denn hani höt s'erscht Mol döffe Kangurue. Sesch schön gseh bem Mami so nöch zliegge.

ech fühle mech geborge bem Mami.

 

De Papi hed mer denn no z'ässe gä durch min klini Schluuch. (De Papi denkt werklech nomme emmer as Aesse) Noch ere guete halbe Stond hani denn weder i miis Bettli müsse. Sesch scho schöner bem Mami.

 

Die nätte Fraue vom Pflegepersonal hälfid mehr ganz fescht ond lueged zo mer. Die wicklid mech, die füetered mech, die tröschtid mech, wenn s' Mami ond de Papi ned omesend.  Ech blenzle emol ond luege, obs öppe au en junge Arzt ommehed. (Me muess jo ganz früeh vorsorge. Aber glöcklech werd mer demit wohl ned.)

 

Freitag, 6. Januar 2012:

Leider chomi kei 3 Königskueche öber. Doch de Papi hed eine metbracht. Da de Papi onds Mami de König ned gfonde hend, ha halt ech jetzt Königschrone für mech gno. Ech ha höt doeffe 2 x bem Mami Kangurue. Sesch schön beruhigend gseh. Morn darf denn de Papi emol probiere. De Grosspapi ond s Grosmami send auch chorz cho luege, denn hends zom Timo ond zom Livio müsse gho gaume.

Höt hanis Mami aglueget ond auch em Papi Zonge usegstreckt. Er hed mer denn höt obig no es Schlafliedli gsonge. Ech hab höt guet gässe ond vel gschloofe. Ech ha scho einigi Mails becho. Lese die denn, wenn i deheime benn. Danke allne. Ech bruche kei Antibiotika meh. (ond ech zie emmer die komisch Kappe os, wos mer do alegid.

 

Samstag, 7. Januar 2012

Höt esch Mami scho am Morge be mer gseh. Sie het denn versuecht mer D'Wendle zwächsle. Sie muess das no chli übe. Doch sie cha mech halt no ned so löpfe, wie sie mech denn spöter chönd näg. Mini Hüfte send halt noch ned so stabil. Am Nomittag send denn s'erst Mol de Nonno ond d' Nonna of Bsuech cho. De Nonno hed ständig wölle mini Händ vorem Gsecht wegnäh. Er meint, ech chöni ned Schnuufe. D'Nonna hät me am liebste grad metgnoh. Denn es e chli ruehiger gseh, bes s'Mami mehr denn weder hed d'Wendle gwächslet. Sie hed mer Temperatur gmässe ond denn hani 3 x gschiislet. Noch dem lange omzieh ha ni denn zom erste Mal bem Papi of de grossi Buch döffe. Det hani gässe ond be denn igschlafe. Esch schön warm ond agnehm gseh. E chli kutzelet heds a mim Chopf wo ni em Papi a Bart ufechrablet be. Den beni wieder is Bettli ond ha denn tüüf gschloofe.

 

Sonntag, 8. Januar 2012

Am Morgen esch Mami cho ond den hed Sie mech met de Schwöstere zäme in e komisch warmi Sach inegleit. S esch mis erschti Bad gse. Höt hani wieder e chli zugnoh ond meh zässe öbercho. De hends mech wieder lo schloofe. Erst am halbi füfi send s'Mami ond de Papi weder cho. Denn hed s mami weder d'Wendle gwächslet. (De Papi traut sech no ned) Ech ha extra jedes Mol, wenns Mami potzt gha hed weder schiisslet. (3 x, das hani gärn gmacht. Den chan ech länger omeluege.) S Mami hed denn mech zo sech a Brooscht gno. Ech ha versucht det suuge. So ganz chani das no ned. Doch Uebig esch guet wörd jetzt wohl de Götti säge. Nachdem de s'Mami müed gseh esch hed mi de Papi uf sech gno. Det beni den igschloofe. De Papi kontrolliert mi au denn die ganzi Zyt ofem Monitor.

 

Montag, 9. Januar 2012

Höt han is em Mami weder zeigt. Ha direkt nochenand 3 Windle verschisse, hed aber Spass gmacht. Das esch astrengend gse, so han I denn am Nomittag doregschlofe. De Papi esch am Obig denn no verbii cho. Er hed en ganz en trömlie Ma debi gseh. Er hed sech be mer vorgstellt. Er sig denn de Götti ond er werdi noch viel met mehr ondernäh. Ech be müd gse ond hanen einfach agheined. Er hed mer sind Fenger gä, da hani auch e chli gno. (Hed so komisch gschmöckt noch dere Desinfektionsflüssigkeit) Ha wiiter gschloofe. Das esch mini Lieblingsbeschäftigung.

ech cha scho cooli Geschte mache. Hi Fans!!!

 

Dienstag, 10. Januar 2012

Mami war heute schon früh da, sie darf ja nach Hause gehen, ich muss noch hier bleiben. Mags Ihr aber gönnen. Ich darf heute bei Ihr liegen und sie versprechen mir, dass ich bereits ab morgen einen Schoppen bekommen soll. Früh übt sich, wer mal trinken will. (hehe, jetzt red i schon in ere so komische Sprooch, stelle mer doch weder of buuredütsch om.) De Papi esch sie denn am halbi eis go abhole. Glaub sie esch froh gse, emol us dem Spetal z cho. Ech hab den pfuuset und am Obig esch denn de Papi no do gseh ond hed mech zu sech gno. Den hed er mer 36 ml z trenke gäh ond mer Liedli vorgsunge. Em Papi han i aus T-Shirt packt ond es Muul gsteckt.

Ech ha jetz auch eigni Kleidli, wo nech cha azieh. Denn hani wieder müsse is Bettli zom go Schloofe. Muss jo viel schloofe.

ond deheime hend mer d'Martina, de Gregi, de Nick, de Grosspapi onds Grossmami en Tafele ufgstellt. Sesch haerzig.

Ech ha so schöni rosa Bäggli. Das schtemmt.

 

Mittwoch, 11. Januar 2012

Höt esch nume de Papi verbi cho. S'Mami es ned so ganz gsond gse. Defoer hani em Papi sis Libli s'erscht mol voll gsaberet. Ha müsse de Chopf vo links nach rechts dreie. S'esch eifach schwerig die rechtigi Position of dem grosse Buuch vom Papi z gfende. De Papi hed mi aber öber en Stond be sech of dem Buuch gha. in es paar Johre gomp i denn of dä Buuch.

De beni wieder go schloofe. S'Bettli werd jetzt noeme gheizt, da ech jetzt hetzig gnueg be om sälber d'Temperatur erzüege z'chöne.

 

Donnerstag, 12. Januar 2012

S'mami ond de Papi send hoet zo mehr cho. Ech hab hüt em Bettli müsse gwecklet wärde. Das esch loschtig gseh. Ech ha extra abgwartet, bes s'Mami mehr die neu Wendle änegleiht gha hed, denn hani si grad voll gmacht. Wo si putzt gha hed denn au grad d'underlag ond e chli au as Mami äne. Debi hani ganz normal wiitergschloofe. Be höet e müdi Meite gseh. Bem Füetere vom Mami hani emmer gschloofe. Ech ha weder 20 Gramm zugnoh. De Papi hed denn müesse gho. S'Mami hed ofs Tante Rebbi gwartet. Sie esch mer denn au vorgstellt worde. Met dere werd ech denn vel zäme aesse choenne. De Rescht vom Tag hani gschloofe.

 

Freitag, 13. Januar 2012

De Papi hed höt muesse schaffe, so esch halt s Mami be mer gseh. Ech ha doeffe bädele. Denn hani wieder versucht, s' Mami e chli z'ärgere. Ech liebe das, wenn ech doe schissele, wenn sie grad weder en neui Windle änemacht. S'Mami hed denn e langi Heireis mit 2 Büs gmacht ond esch denn kapott gseh. Am Obig hends' mer no einisch agluetet om z froge, wies mehr god.

 

Samstag, 14. Januar 2012

S'Mami ond de Papi send hoet morge mech cho Bsueche. Ha mini Chleidli z'Nach alli verdräckt. (S'Mami nemmt sie de hei zom Waesche. Ech vo scho früeh demit a, si omezjage!!) Nochem Wickle hani weder doeffe go Känguruhe. Ech ha am Noggi gsöggelet ond denn beni igschlofe. De Papi hed hoet si grosse Tag gha ond sie hend em Planetarium vone me neue Stärn gredt. Das be jo ech. Ech ha de Rescht vom Tag gschloofe om mech z'erhole, dass i denn morn weder s'Mami cha aergere bem Windle wächsle. Das bruucht Chraft.

Ech noggele scho gärn, doch die gänd mer eifach noch nued. sie sprützid mer s'esse lieber dore so ne Schnur i minere Nase. Di stoerrt mi scho.

 

Sonntag, 15. Januar 2012

Scho am Morgen send  mini Eltere of Bsuech cho. Ech be denn gwögt worde. Ech ha i de letzten 2 Täge 60 Gramm zugno. Keine soll jetzt of d'Idee cho, dass ech of Diät muess. Ech ha de e chli chöenne bem mami a de Bruscht uebe, doch ech be halt no z chli dezue. Ech be denn igschloofe. Am nomittag hani gschloofe. Am Obig hend mi s'mami ond de papi öberrascht. Ech ha denn weder chönne bem Papi of em Buuch lige ond mech lo fuettere. Det gfalts mehr, det esch es auch warm.

 

Montag, 16. Januar 2012

S'Mami esch am Morge scho cho mech cho weckle. Sie hed vel Chleidli metgno. Die chan ech jetzt alli verdräcke. Müd esch den s'Mami am Nommitag weder gange. Am Obig esch sie met em Papi no einisch verbi cho. Denn hani weder bem Papi döffe lege. Det esch es emmer schön warm. Ech ha höt starch de "hitzgi" gha. Doch denn beni bem Papi igschloofe. Morn darfi weder bade. (Mol luege, wie warm das Wasser esch)

 

Dienstag, 17. Januar 2012

Früh am Morge hends mi scho gwoge. ech be jetzt schwerer als be de Gebort ond ha jetzt 1810 gramm. Med em Mami ond e liebe Hoelf ha ni denn hoet zom erschte Mol doefe usere Flaesche trenke. (ha 8 ml gschafft, glaub das esch scho guet foer en so chlini Bohne.) Denn esch au no d'Nonna verbi cho. Sie hed ständig Angscht om mech gha ond ständig i sonere komische Sproch gredet ond gfrogt. Ech sig so chli ond se troui ned. Denn esch de Nonno no cho. De hed scho gar ned troued onds Mami ständig zämegschisse, sie müess me luege. Glaub dä hed me Angst als ech.

 

Mittwoch, 18. Januar 2012

S Mami esch scho am Morge cho. Sie hend den met mer wieder versucht en Schoppe z'ghä, höt esch das extrem astrengend gseh ond denn hani mi no verschlückt. So hani höt nor 2 ml so chönne trenke ond bend denn igschloofe. Am Obig hani denn bem Papi dörfe of e grossi Buuch. Det hani zerscht no de "hitzgi" gha. De Papi hed bedure gha met mer. Er hed mi gfüttered ond denn beni igschloofe. S' Mami em Liegestuehl denäbe au. Ech ha denn weder es Bettli müesse. S'Mami hed sech eifach ned chönne loese vo mer. Ech ha mini Ruh woelle ha ond ha sie denn met beide Händli mal wägstosse. (S'Mami macht das jo au, wenn sie mued esch.)

 

Donnerstag, 19. Januar 2012

Höt beni wieder gwoge worde. Ech ha jetzt 1880 Gramm. Ech ha also schön zugleid i de letzte 2 Täg. Höt beni ganz e grossi gse ond ha 11 ml us eme Schoppe tronke. Am Nommitag esch no en Aerztin mech cho bsueche. Ech be jetzt 42.5 cm gross ond ha 30.5 cm Chopfomfang. Sie esch glaub zfrede met mer. S'Mami hed denn hei müsse, woell d'Naomi met em Gotti ond de Rebi of Bsuech cho send. Au de Götti ond 'd'Melissa send cho. Sie hend foer mech en wiiteri Tafele ufgstellt. S'esch haerzig.

Di Tafele hends mer lo mache. De Bär setzt ofem Stärn.

 

Freitag, 20. Januar 2012

S'Mami esch hoet weder am Morge cho om zo mer zluege. Sie hed mech gwecklet ond denn auch de Shoppe gä. Ech cha jetzt scho gut 10-15 ml us em Fläschli trinke. Das macht mech aber super müed. Versuche drom schnoell z'trenke, dass ech ned ischloofe bevor s'Fläschli läär isch. Denn nemi halt auch e chli Looft met, dass i denn de Hitzgi oeberchome.

De Papi hed mi am Obig denn weder be sech uf de Buuch gno. Det chani rechtig entspanne.

 

Samstag, 21. Januar 2012

Ech gratuliere em Grosi zom Namenstag. Hoet esch en stränge Tag. Ech werde am Morge scho badet vom Mami. De Papi esch au debi ond filmet ond foetelet das. Ich vertreie mini Auge ganz fescht, wenn i im Wasser be, das esch en komischi Sach. Den hani Dorscht oebercho ond me als 20 ml trunke usem Fläschli (De Rescht vo minere Ration lönds mer denn noch met de Sondierig ine. Ech be denn bem Mami igschloofe. Am Obig hends mi denn gwecklet. Denn hani so rechtig gschisselet. Ech be jetzt 1970 Gramm schwär. das esch doch guet. Esch es en herte Tag foer mech gseh. I de Nacht hani halt den e paar mol weder vergässe z'Schnuufe. d'Maschine hed das gmerkt. Ech cha ned bschiise. Denn choemid di liebe Pflegerinne cho luege, doch denn bin i alle scho wieder selbständig am Schnuufe. So jetzt schloofi.

s'Bade macht müed. Mini chlinste Kleidli send scho bald z'gli.

 

Sonntag, 22. Januar 2012

I de Nacht hani s'erscht mol es ganzes Fläschli Moulch tronke. Min Rekord liet jetzt be 38 ml. De bini aber rechtig mued worde. Am Morge send s'Mami ond de Papi do gseh ond mer hends lueschtig gha bem Wendle wächsle. Denn weder Schoppe aesse bem Mami ond em Papi ofem Buch liege. Das fend ech guet.

 

Montag, 23. Januar 2012

Ech trenke jetzt emmer weder emol es ganzes Fläschli von 40 ml. Denn beni aber mued. Ha jetzt 1990 Gramm und 43.5 cm Grössi. En Aerztin hed me au no ondersucht. S'esch glaub alles guet. De Papi esch am Obig do gseh, s'Mami am Morge ond am Obig. Ech ha halt znacht emmer no es paar Abfäll, doch soescht gots mer guet.

 

Dienstag, 24. Januar 2012

S' Mami esch am Morge cho ond mer hend weder es Fläschli zäme abgeläärt. Ech trenke gärn schnöll. (Ech chönt jo ischloofe ond den chomi ned alles öber) Ech freu mech foers Mami. Sie cha hoet nach Monate weder emol zom Coifför gho. Vorhär esch sie halt med mer do gläge. Met em Papi machi au e Deal. Wäge mir chönder d'Hypothek belliger öber. Da möchemer aber denn fifty-fifty. Gäll Papi. Ech trinke fliessig Fläschli.

 

Mittwoch, 25. Januar 2012

Hoet esch weder Badetag. S'Mami chas scho langsam besser. Ond ech han weder zugleit. Ech be jetzt 2040 gramm ond chome jetzt me zässe oeber. Ab morn stellids mi uf 4-Stunde Rhytmus om. Demit brengi em Mami si ganze Tagesablauf voellig os em Plan. Findi cool, dass i scho alles cha doerenand mache. Am Obig esch de Papi au do gseh. Mer heds hoet sehr guet bem Papi gfalle. Ech hami ganz schräg of em obe änegleiht ond ha gschloofe. Hoet chomi ab de 11 am obig scho mal e chli anders zässe.

 

Donnerstag, 26. Januar 2012

Ha jetzt mol 2 Täg nüd gschrebe. Muess jetzt me Schoppe trenke ond das macht mued. Am Donschtig esch s'Mami erscht nochem Mettag verbi cho. Si hend noch gwartet met omstelle. Also hed si au müsse warte. De Papi esch am Obig cho. Ech trenke jetzt auch me, doch denn hani auch Honger, denn ech muess 4 Stunde warte met ässe. De Papi hed am Obig bes noch de 10i mech kanguruht. S'Mami esch nebedra fascht schnöller igschlofe als ech. Doch denn beni au mued gse.

 

Freitag, 27. Januar 2012

juhui, ha weder 70 Gramm zugleiht. be jetzt 2110 Gramm schwer. Ond ech trenke emmer sehr schnell de Schoppe. (S'chönt mer jo öpper da wägtrinke oder ech schloffe vor em Aendi weder i.) Am Nomittag esch denn auch no d'Nonna verbii cho. Sie hed weder so chomisch gredt. Ond hed ständig Angst om mech gha. Sie hed gmeint, ech gsäch jetzt so wie de Papi us. (Also das esch gemein, de Papi esch ständig ned rasiert ond ech ha kei Bart!!) Sie hed mi grad wölle knuetsche. Das wird jo loschtig met dere Familie. Am Obig hends foer mech em IKEA noch ikauft. Glaub det goni den au no äne.

 

Samstag, 28. Januar 2012

De Papi onds Mami hend am Mettag mech gweckt. Ha hüet 3 Schoppe nochenand tronke. (Ond ha emmer no Dorscht gha) Bem Papi esch es am Nomittag so schön agnem gseh of em Buuch. ha grad gschloofe. Nach em Schoeppele bem Mami beni denn a de Scholtere au igschloofe. Em Mami esch defoer de Arm igschloofe, doch sie hed ned los glo. Ech luege jetzt gärn omenand ond mache Stirnfalte wie de Papi.

Bem Papi esch es hoet eifach schoen gseh.

 

 

Sonntag, 29. Januar 2012

Höt hanis gschafft, dass S'Mami ond de Papi scho hend ganz früh müsse ustoh. Da ech hoet Badetag gha ha (gfallt mer zwar ned so), hends scho am halbi nüni müsse i de IMC si. Das esch em Papi secher schwär gfalle. Sie hend sech zerscht lo informiere, was i so alles i de Nacht agstellt ha. Höt beni brav gseh. Ha ned en einzige Abfall gha. Ond ha ganz vel Schoppe trunke. Ech ha jetzt wieder 70 Gramm zugleit ond be jetzt 2180 Gramm schwär. S' Bade gfallt mer ned so, doch nochäne chomi emmer neui Chleidli öber.

Ech ha jetzt s erschte Mol Hösli a ond Schüeli. D'Chappe leg i ned a. Ha zwarm.

 

Bem Pflege vo minere verschtopfte Nase wehri mi wieder wie ni nume cha. (Ech weiss scho guet, wie mer so öppis cha blockiere) Ech ha scho die ganzi Zit honger gha. S'Mami hed mer denn wieder en ganze Schoppe ghä. Ech ben den voellig erledigt gsi. So beni denn zom Papi gho schloofe. Det esches schön warm ond er kontrolliert mech au ständig ofem Monitor.

Nachem Mettag esch s Mami denn au wieder cho ond hed mer weder en Schoppe ghä. Mer send denn beidi müed gseh ond ech be igschloofe. Im Traum eschmer gseh, als chäm ech do enere grosse Verschwörig of d'Spuur. Die gänd mer alli de Noggi. Ech süggele dra, doch es chond einfach nüdd. Doch denn hani gliich Möulch im Buuch. Das esch scho Bsesch. Chome de schono druuf, was do passiert. Benen schlaui Meitsche.

Hoet gehts au es Foti met em Mami. Ech be scho wieder am Schloofe.

 

 

Zurück zur Hauptseite