Es rägnet de ganz Tag fescht. Ech gmerke ned vel vo de Sprötze vom letzte Donschtig. Mer goend no of Dierikon. Det esch e Spelwarelade. Ech flippe det fascht us ond wot alles alänge ond metnäh. Bem istige is Auto hets so gränget, dass ech e chli nass worde be. De heime hani denn no choenne met em Papi bade. Ech ha neu en Wal becho, wo omenand schwimmt. Es gfallt mer s'Mami zärgere, well ech emmer wiede de Fenger ond alles, woni cha bruuche ist Wasser ha ond denn is Muul nehme. Emmer nome Melch ond Fänkeltee, do muess mer doch oeppe e chli anders trenke. Ech be den ganz mued gse ond ha nomme 4 mal Trunke gester. Doch einisch fascht 250 ml ofs Mol.

Ech chome scho früh am Sonntig. Die sellid ufstoh. 0700 Uhr Tagwache. Doch mech blooged de Buuch. Drom beni verwachet. Ech trenke ond denn schloof i no e chli bem Mami em Bett. Dränge sie gärn use. De Papi got met mer go luege, wies so usgeht em Garte noch dem velle Räge. S'Mami get mer fascht 75 Gramm Choerbis zom Aesse. Denn got de Papi a Match om sech z'ärgere. Ech chome Bsuech oeber vo de Naomi ond de Tante Rebi. Sie cha fascht ned glaube, dass ech so gwachse be. Ech ha mis Gaudi met dene beide. Met dene semmer au no go spaziere. Em Altersheim hets en schöne Spielplatz. Ech ha serscht mol Häsli gseh ond Ente. Denn hani zueglueged wie d'Naomi vo s'Ritiseili gange esch. Ech ha denn met em Papi sinerer Helf das au usprobiert. Er hed mit no starch ghebt. Doch ech be Stolz gseh. Ech ha jetzt de ganzi vorderi Stubeteil für mech zom Spele. Die hagid das fascht ab, well ech mech schnell tue omedreihe. Ech be ganz fuli ond go gli go schloofe.

Hoet muess de Papi weder go schaffe. Ech bliibe bem Mami. Ech schlofe em Bett bem Mami weder i ond verwache erscht am halbi zäni. Ech esse am Mettag scho 100 gramm Brei. Denn goemmer zo de Frau Wecki. Sie mess mech ond ech be jetzt 66.5 cm gross ond 8.570 Gramm schwär. Ech darf jetzt au e chli Brotrinde ässe. De Papi freut sech met mer. Ech lache no vel met em Grosi ond Grosspapi. Sie hend das au gärn. Ech schlofe denn bem Aesse weder i ond träume wiiter vom Aesse.

Am Morge schlof ech bes gäge die 7i. Denn esi ond warte, bes Debbi met em Alessandro of Bsuech chond. Er spiel denn met mer. Ech gniesse das, wenn i Lüt i de nöchi ha. Am Nomitag gömmer go laufe. Leider beni e lei of em Spelplatz im Altersheim. S'esch langwilig. Ech schlofe ond wot ned ufwache, so muess s'Mami ere Termin verschiebe. De Papi begrüss i met grossem Lache ond Gompe. Au er hed Freud a mer. Er muess am Obig no id Stärnwarte ond cha nomme chorz bliibe. Ech schloofe früh i.

Am Morge chond s'Grosi ond luegt zo mer. Mer händs rechtig loschtig metenand. Au de Grosspapi sengt foer mech hoete. Ech be ganz em Mettelponkt. Das gfallt mer. Ech esse de ganz Brei ond schlofe am Nomittag mehr als 90 Minute. Das esch fascht Rekord foer mech. Mer goend 2 x go laufe zäme.

Am Morge brenger mer s'Mami zom Schaffe. denn goni zo de Nonna. Muess mi zerscht weder gwoenne a dä Ort, doch ech has den ganz loschtig ond versproetze d'Nonna met Choerbis. De Nonno zeigt mer d'Uhr ond Ehre Lüchter mit ganz viel Steinli dra. Met em Papi goemmer denn s'Mami go abhole. Ech gseh am Obig au no s'Grosi ond de Grosspapi ond ha mini grossi Freud dra.

Ech stone scho gägi di 6i uf. Hoet choenti s'Mami jo länger schloofe. Denn trenk ech ond lege no e chli ist Bett vom Papi, well är uf muess go schaffe. Mer hend am Morge Stress ond choemid trotzdem 10 Minute zspot zom Pekip in Sursee. Det gfallts mer. Ech cha met velne andere Chend spele ond zueluege, was die so moechid. Em Mami bisli det of d'Hose. Denn goemer hei ond ech ch aendlech Breili aesse. Mer goend go laufe ond am Obig no go ichaufe. Mer gfallt das, wenn i so vel Liechtli em Pilatus Märt cha aluege. met em Papi luegi bem Trenke vom letzte Schoppe no e chli Match. D'Schwiiz gwönt.

Ech chome scho am 7i am Morge. die selid uf. Ech wot oeppis erläbe. Also goemmer am Morge id Stadt Luzern. Ech cha s'erscht mol i Manor ond gseh die Touristeattraktione. Denn chauft mer s'Mami serscht mol Riisrigel. Dä darf i denn probiere. Ech ha zwar d'haelfti nochänne oeberall verteillt, doch ech ha das guet gfonde. Denn hani no doerfe en Horw Melch trenke. De Papi hed en Bruelle muesse go hole. Nochäne het er met mer badet. Ech has gschafft, dasmol Wasser über d Badwanne use zsproetze. Ech ha au emmer weder versucht, ufzstoh. Bem plaperle redi jetzt au so 2 glichi Silbe nochenand. Gäg de Obig hani no dosse choenne bem Grilliere zuliege. S'Grosi hed mi ghebt ond de Grosspapi hed gsunge met em Papi foer mech. Do hani Freud gha. Ech ha am Nommitag no es Zewitecheli usprobiert. Das gfallt mer weniger. Ech cha mini Bei ned rechtig positioniere ond schlofe ned rechtig. Drom hemmer das weder abbroche.

Ech lache durend met em Grosi zäme.

ond au met em Grosspapi

Ech stone so gäge die halbi achti uf. Denn trenki ond warte, bes s'Mami ond de Papi gässe hend. Ech spele e chli. Denn goemer a See go laufe. Det hed de Papi foer mech en Schwan ond Aentli gfoetelet. Am Nomitag hani no em Garte e chli Bluemli vom Grosi abgrisse. Das machi gärn. Denn sem mer bem Nick iglade gsi für s'Täfeli vo sinere Gebort. Ech ha em ganz ufmerksam zugluegt was er macht. Ech be aber e chli ifersüchtig gsi, well s'Grosi au met em Nick gspelt hed.

Mer essid zäme. Es hed det vel Mogge, doch ganz neui Sache zom Entdecke.

Ech gniesse die schöni Ussecht of de See.

Am Morge nemmt mech de Papi uf, wel s'Mami zom Doktor muess. Denn leiht mech de Papi sogar a ond ged mer z'trenke. Denn holt mi de Nonno met sim Auto ab, damet ech denn scho en Aemme ben wenn s'mami chond. Ech cha i'd Migros go luege, denn chond s'Gotti uf Bsuech be de Nonna. Die hani scho lang noemme gseh. Am Nomi be ni is Kafichränzle met de Nonna, de francesca, de Filomena ond em Mami. Die Fraue hends scho guet. Am Obig hani no en Lachafall gha met em Grosi. Ha fascht noemme choenne. Au s'Grosi hed fascht noemme choenne vor Lache. De Grosspapi hed mi defoer uefegloepft zom grosse Windspiel be em i de Wonig. Ech liebe so Sache.

Ech ha hoet zemlich Zahnweh ond drom beni e chli rompelsorig. Ech ha Müh zschlofe. Drom schlofi denn bem Brei ässe i. Met em Mami beni no in Pilatus Märt go Moulch foer mech z'kaufe. Met em Papi hani denn noch es paar Minute Schwiiz-Albanie glueget ond mech be em zum erschte Mol sälber of de Schoss zom Sitze ufgrechtet. Ech wot jetzt au scho versueche zom Stoh.

Ech ha fescht Zahnweh ond au beni starch vercheltet. S'Grosi luegt zo mer ond sie het am Obig s'erscht Mol Rueggeschmärze. Ech trample jetzt halt vel ond be schwerer worde. Ech mache d'^Bruegg ond wot emmer versueche ufzstoh. Ech schlofe am Morge, doch am Nomitag wot i noemme schloofe. Ech gniesse, wenns Mami hei chond ond de Papi. Ech ha mueh izschloofe wege dem bloede Schnoderi.

Ech ha wenig gschloofe. Ech ha fescht Zahnweh ond be wäge dem auch starch verchältet. Drom bliebt s'Mami hoet be mer ond god ned go schaffe. Ech bruche jetzt ehri Wärmi. Ech schlofe zwar am Morge e chli, doch ned am Nommitag. Ech spele ond lache, doch ech ha emmer weder Schmärze wäge dene Zähnli. Ech schlofe de scho e de Arme vom Papi i, bevor ech de letzti Schoppe bechome. Ech be so mueed.

Juhui. s'Mami gratuliert mer am Morge met em ene italienische Lied. Ech ha min erschti Zahn becho. s'Spitzli lueged jetzt scho voere. Jetzt chani denn afo met em Nonno Fleisch ond Woerscht z'ässe. Nid nomme emmer so "gschlaberbreili"!! de Papi luegt zwoeschetinne zo mer ond mer spelid metenand. Er chond met mer of de Spelplatz wo mer d'Tante Martina ond de Nick teffid. Mer goend am Obig go ichaufe, dass mer oepis zässe hend.

Ech chome so gäge die 7i am Morge. Ech go denn go Melch trenke ond schloofe denn weder i. Allerdings ned allzu lang. s'Mami got of Horw a Chenderchleiderboerse ond holt mer veli schöni Sache. Ech esse weniger Breili als au scho. Esch e chli floessiger wos Mami jetzt gmacht hed. Vellecht das oder aber das bliede Zahne. Das esch scho rächt astengend. Ech bechome am Nommitag no Bsuech vos Buehlmanns. Sie koennid mech fascht noemme. Met ene zäme goemmer go spiele of de Spielplatz bem Altersheim. Det esch no en Guggemuesig gseh ond ech ha scho rechtig of de Arm vom Papi ometanzed. Nochäne gehts no en Pizza in Horw zäme. Ech wot det au metmache. Wenigstens darf i no echli trenke usem Glas vom Mami. Ach jo vergässe hani fascht, dass i no s'halbe Bad bem Bade onder Wasser gsetzt ha met mim plansche.

Mini erschte Versüch bem Ritiseili bem Altersheim.

Ech schlofe ned allzu lang. Ha Honger ond Zahnweh, doch defoer schlofi nochäne weder i em Bett bem Mami ond Papi. det chani mech so rechtig gross mache. Es so grosses Bett foer sone chline Portion.

Noch guet 2 Stond schlofe hani weder gässe ond denn semer go laufe. Ech ha e Chend zuglueged bem Spielplatz. De Papi hed no grilliert ond ech ha em Fuer zuglueged. Ech be denn igschlofe am Obig no bevor s'Grosi ond de Grosspapi hei cho send. Muess sie halt morn denn begrüsse. Ech dreih mech i de Nacht au of de Buuch ond s'Mami hed denn aue fascht es Härzchriesi.

Nochdemi scho am Morge früh Honger gha ha schlofi no einisch e Stond. Denn ess i weder e chli Breili (80 Gramm). Noch em Mettag bsuechemer d'Naomi ond d'Nonna z' ämme. d'Naomi wett, dass ech met ere spiele würde. Doch ech be halt no e chli zchli. Das werd denn scho no aendere. Ech chome jetzt no es 2. Zähndli onde ond eis au obe über. Be drom e chli lunisch. Am Obig machi no es Bsüechli bem Grosi of em Balkon. Muss doch luege, was do be de Nochbere so baued werd. Met em Papi hani no e chli gspelt ond benn denn bem Trenke igschloofe.

Well s'Mami hoet en Termin hed en Rotheborg goemer scho gli am Morge zo de Nonna. Det gets z'aesse ond ech bliebe denn be de Rebi ond s'Mami got chorz a dä Termin. Ech spele met de Naomi ond chötzle weder emol d'Rebbi voll.

Ech gone hoet scho frueh zo de Nonna. De Nonno begrüsst mech ond leiht es Decheli über mech wells Rägnet. Ech spele met em Lüchter i de Wohnig ond lache. Allerdins moechid mer mini Zaehndli scho weh. Ech verbrenge de ganz Tag met de grosse Familie ond ess ond trenke vel. Au glachet werd. Allerdings begrüssi denn au de papi onds Mami met eme lache. Ech be so rechtig ufzoge. Bem Heicho kontrollier ech, ob no alli Spelzüg vo mer do sind.

Mer goend scho früeh of Aemme. Det warted de Nonn, d'Nonna ond au d'Naomi. Met ere speli lang ond mer hends loschtig. Ech darf ere a de Hoore zere. Das gfallt mer. Au darf i a de Lampe met dene abehangende Gläsi met em Nonno omezopfe. D'Nonna gseht das net so gärn, doch mer gfallt das. Ech schloof am Morge e chli, nochäne hani kei Zyyt me. s'Gotti esch am Mettag au do ond ech gniese sie. Mer spaziered no met de Nonna ond denn esch de Tag scho bald weder düere. de Papi holt mi ond denn beni am Obig bem Mami ond schloofe scho gli ii.

Ech cha scho gueti Usdrück mache.

Ech verwache scho gäge die 6i am Morge. de Papi zeigt mer denn so es Licht am Hemmel. Er seid, dass seg d'Venus. De cha mer jo no vel verzelle. Ech weiss no ned was do dosse so esch. Met em Mami goni gäge de Mettag i'd Stadt wels schön esch. Ech ha fascht e chli warm gha. Am Obig goemmer no go poschte. Ech darf weder em Maxicosi uf em Ichaufswage setze ond omeluege. Deheime tuni no de Papi e chli met em PC stresse. Ech übernehme s'Kommando.

Ech bliebe am Morge bem Papi ond go gos Grosi bsueche. Ech wot ond cha ned schloofe. s'Mami got zom Coiffeur. De Papi ond ech essig zäme. I sine arme schlof ech denn i. Nochäne goemer no go Poschte. Ech bechome es Stühli, woni denn druffe cha aesse. Juhui, ändlich. De Papi ond de Grosspapi setzid das no zäme. Denn chanis usprobiere. Stolz zeig ech em Nick ond em Grosi wie das goot.

ech be jetzt ganz debi bem Aesse.

Mer gönd hoet zäme of Horw ad Chelbi. Es hed vel Chend ome, doch ech be mued ond schloofe i. Denn deheime moechid mer dosse Teschgrill. Ech muess weder zuluege. Scho no gemein. Zom Glöck chani no e chli met em Grosi plauderle. De Nick esch au no do ond ech luegem enteressiert zue, wie er tued sändele. Er zeigt mer au, wie är tued zähndli puetze. Ech wot das au probiere ond neme denn so nes Zahnboerschtli es Muel.

Ech gone met em Mami of d'Leutsch. Mer send em Pilatusmärt ond goend e chli go schoppe. Ech gniesse das. Am Obig hed s'Mami Stress well sie no muess go Izahligsschine für d'AGL ipacke. De Papi lueged zo mer ond mer goend e chli de Grosspapi ond s'Grossmami go bsueche. Ech ha scho mini Route, was i alles wot gse det obe. Muess gnau alles abgarbeitet wärde, schöst beni ned zfrede ond ruefe us. Die sellid mache was ech wot. Schliesslich be ech jetzt do d'Hauptperson.

Ech darf hoet weder of de Spelplatz. Det chani met eme Buob wo 8 Monet alt esch spele. Mer beidi of em Schaukeldings do. S'Mami hed vergässe wie dä Bueb heisst. Er hed no 2 Gschwösterti wo sälber spelid ond s'Grosi met de bi gha. Am Mettag hani choenne bem Grosi obe spele. s'Mami esch zom aesse igladt gsi. Das esch schoen, so chani s'Grosi ond de Grosspapi me gniesse. Ech plange alle of de Papi ond wot em Mami devo, wenn ech en gsene. Er git mer denn no de Schoppe ond ech schlofe i.

Ech darf hoet de ganz Tag bem Grosi si. Ech wot also ned vel schloofe. Mer goend de Grosspapi go wecke. Denn chani scho gli go laufe. Mer goend of de Spilplatz voere. Aesse wot i aktuell ned so vel. Ech be eifach zfuul met dem Breili. Mölch trenke esch vel eifacher. Ech cha bem Grosi am Tesch setze ond wet am liebste us dem Täller aesse. Das wot aber s'Mami no ned. Am Nomitag luege mer doesse no zue, wie die nebedra tuend boue. Mer goend no einisch go spaziere well s'Grosi gmeint hed, sie choen mech ueberlischte, dass ech schloofe. Ha mi aber wacker ghalte ond ned gschloofe. Erscht bem Mami nochäne hani denn gschloofe. De Papi hani met ganz ver Zapple begrüsst.

Scho ganz frueh am Morge beni be de Nonna verwached. Ech be halt em Auto igschloofe. Det esch de Nonno au gseh. Mer hends so rechtig loschtig gha. D'Naomi ond ech hend gspelt ond noemme woelle vonenand lo. Sie esch truurig gse wo ni weder hei be. Vorhaer aber semmer no go spaziere. Gässse hani au be de Nonna ned rechtig. Ech ha mis 2. Zähndli ond das macht halt we. De Papi hed mi scho frueh muesse hole well aer no en Groppe i de Staernwarte gha hed. Mer hend no Stau gha im Rüüspoorttunnel ond ech be igschloofe. S'Mami hed mi deheime empfange ond mer hend metenand de Obig verbrocht.

Met em Mami gniess ech de Tag. Ech esse hoet weder me als 100 Gramm Brei. Dasmol chomi Ruebli oeber. Ech schloofe denn i, wo s'Mami hed woelle zo der Tante Rebbi. So hed sie halt muesse warte bes sie hed choenne go bes ech verwached be. Denn semmer met de Naomi ond de Rebbi i Ikea. Das esch s'erschte Mol, dass ech det gse be. Ech ha denn nochäne no Bekanntschaft mit alte Verwandte vom Mami gmacht. Sie hend mer no esch Gschänkli gmacht. Am Obig beni no go ichaufe i Pili. Ech be denn aber  mued worde ond igschlofe.

S'Mami got hoet foer mech en ganze Tag a ne Kors. Sie luegt was mer em Notfall so set mache. De Papi hed welle zo mer luege, muess aber jetzt a d'Beerdigung vo sim Goetti. So goni am Morge zo de Nonna. Ech has loschtig met em Nonno, de Nonna, de Naomi. De Papi chond mi denn weder cho hole am Nomitag. Vorher hani no d'Rebi vollchötzled. Deheime esch au no Tante Martina gse wo mich au e mol hed woelle träge. Sie macht no Arbete am PC vom Papi foer de Chendergarte. Ech darf am Obig no Bade met em Papi. Das esch cool Ech cha fascht ellei e de Wanne setze ond cha so rechtig fescht plansche.

Mer schloofid e chli uus. 0715 Uhr es doch spoot. Ech spiele währenddem s'Mami ond de Papi zmoergelid. Ech moecht au met aesse. Nochaene goni go schloofe.l Ech spele jetzt ganz fescht mit chline Sache ond versueche die au z'Packe. Es esch wuescht dosse. Mer choend nomme chorz uese go luege, was die Baustelle be ues so machid. Ech ha hoet weder fescht Zahnweh ond be e chli närvig. Aber ech be gärn bem Papi ond schloofe det au gärn i.