Ech go met em Mami no chorz is Dorf. am Obig chond no s'Röösly Muff. De Papi muess de PC flicke. s'Röösly spelt met mer e chli. Denn wott i aber de scho no de Papi foer mech is Bett zbringe.

De Papi esch am Morge ned go schaffe. Er hed wägem Leodegar oder wie dä Kärli heisst frei. Er got denn met em Grosspapi go boue. Boue, das es jetzt foer mech es wechtigs Wort. Ech cha zueluege, wie die beide s'Dach vo de Garage wägnimmid. Es git denn e Terasse det. Ech be met em Grosi de ganz Tag fascht nome dosse. Am Mettag luegt de Papi zo mer wemmer wend schloofe. Vorhär hed mer s'Grosi no e chli "Tschokolato" gä. Das esch fein. Bes am Obig hend de Papi ond de Grosspapi gschaffed.

ech ha em Grosi sini Uhr gnoh. So beni doch e chli elter.

De Papi brengt mech zo de Nonna. Leider esch d'Naomi no ned det gseh. Ech ha de Papi fascht ned welle lo go. Doch er hed hei muesse go schaffe. De Grosspapi hed woelle wiiterboue. Am Obig wo ni heicho be met em Mami send die denn emmer no of der Garage gseh ond hend met de Motorsagi gschaffed. Mer gfallt dä Lärm. Am Obig hani no met em Papi e chli choenne spele. Em Grosspapi sägi jetzt plötzlich opa. das god eifacher zom rede.

De Papi esch au hoet am Schaffe. Doch mer essig am Mettag alli zäme ond denn am Nomittag, goemmer zäme go ichaufe. Ech wot eifach net em Chaerleli denne bliibe ond ha mi feschti Wille. Ech ha es stuurs Choepfli. Mer goend denn no in Wältbild. Det weiss ech wo de Spelzügrasemäher stood. Dä nemi emmer. Aus Tip-Toi goni emmer go näh. Ech cha scho die Tierli alli awähle. Mer gfallt das. Am Obig schlofi denn mued i.

Am Morge verwach ech ond s'Mami esch ned do. De Papi lueged zo mer. s'Mami esch met de Nonna of Domodossola a Märt. Hoffentlich breng sie mer denn oeppis hei. De Papi hed vel met mer ztue. Ech schiisle scho am Morge früh. Denn esem siis Choggiyoghurt wäg. S'Grosi luegt denn chorz zo mer well de Papi ond de Grosspapi chorz in Pilatusmärt muend. Nochäne nemmt de Papi mech met as Hinterländerfäscht. det hets en "chueli" Usstellig ond e Streichelzoo. Ech cha sogar zo de Häsli ine ond sie streichle. Ech mach denn de Papi no ganz dräckig. Am Mettag gehts Härdopfelstock ond Hackbrate bem Grosi. Ech esse fascht 2 Täller. Nochem Schloofe esch no Tante Martina do ond macht en CD foer de Chendergarte am PC vom Papi. De Papi chond met em Grosi ond mer no Horb abe. Det goemmer i'd Landi. Die hend Stefeli foer mech. Ech cha so denn au i dräck use go em Wenter. Wo mer hei cho send esch d'Martina no do gseh ond ech ha doerfe i^d Baustell vo ehrem Huus go luege. Ech be det oeberall omegspronge. Das hed mer gfalle. Wo denn s'Mami hei cho esch hani au scho gässe gha ond sie hed mer italienischi Buechli brocht.

D'Nonna hed hoet Gebortstag. Tanti aguri a te. Mer goend of de Mettag zo ehre. Alli sind do auch wenns em Gotti ned guet gohd. Es geht e chli Formaggio ond Salume. Ech darf ech chli vom Prosciutto vom Papi näh. Denn gehts Pasta met Tomatesauce. Ech nehme me als en Täller voll vo dem.

Nochem Schloofe hani no trübeli of em Chueche vo de Nonna gseh ond ha die doerfe aesse. Deheime hemmer no e chli Ruebli ustoo, die hed mer s'Mami grad choched. Ech ha aber ned woelle em Trip-Trap ässe, sondern ofeme rechtige Stuhl. det hani em Papi au no e chli Fleisch wäggno vom Vorässe. Ech be scho es Luusmeitschi.

ech isse vel Pasta.

Ech schloefe in letzter Ziit schlächt. Ech choche met em Mami am Morgen ond denn goemer no go ichaufe. Ech ha jetzt aue mis Auto debi. Ech bruche jetzt zom Schloofe no de Cerro. Das esch en Plüschhond. Au hani vo de Martina no es Babi oebercho. Das gfallt mer jetzt, das azlegge ond zumem zluege. Ech be em Momänt en riese chläderi. Ech stiige oeberall ufe wo ni nomme cha. Met em Papi freu ich mech, dass d'Schwiizer Gool gschosse hend ond be de WM noechst Johr debi sind. Hopp Schwiiz. De Papi chauft mer ganz secher dezu liebli.

Es rägnet fescht ond es esch chalt. Doch ech go go luege, wie die viele Luet duend sprenge. Es esch Marathon en Horw. Mer goend zo de Chile go parkiere. Det essch s'BimBam grad am Luete. Nochäne lueg eg us mim Wage zue. De chomi no Chäs oeber. Es sprengid emmer weder luet ome. Wo ni denn s'Grosi gsene, tuemer zäme hopp ruefe. Denn holt de Papi e Brotworscht foers Grosi ond foer üs. Ech esse i allne die e wäg ond esse fascht 2 Stöck sälber. Ech rede jetzt 2-3 Wörtli anenand. (Wenn i wott)

Ech be hoet be de nonna ond sprenge det omenand. Ech spele vel met de Lego ond tanze met de Naomi. d'Naomi ond ech moechid d'Nonna rechtig fertig am Donschtig. De Papi chond mi cho hole ond mer goend denn hei.