Ech go hoet s'Gotti go bsueche. Sie het am Mettwoch gebortstag gha. Es het vel zässe det ond ech esse fascht alli Chäsli ellei. Ech spele au no met de Naomi ond em Samuele. Mer fahrid am Obig weder zrog. Vorhär hani aber no Schoggichueche gässe.

Ech darf hoet met mine Eltere is Wallis fahre. Mehr goend gäge de Obig of Realp ond des of de Autoverlad. Mer choemid so gäge die halbi nüni am obig a. Ech darf em Reisebettli schloofe. Es gfallt mehr. Mini Eltere schaffid no länger. Ech schloofe denn, denn morn gommer früh use.

Mer goend früh uf ond fahred vo Brig met em Zog of Domodossola. Ech muess met em Papi dosse stoh, es git kei Platz. Mer goend denn grad zerst go es Cappuchino go näh ond denn doerfe mer in en Buchhandlig go. S'Mami sucht Buechli of italienisch foer mech ond Naomi. Ech luege interessiert am Märt ome. Ech blibe zom grosse Teil im Buggy, doch denn au no of de Scholtere vom Papi. Ech schloofe denn i. Ech verwache weder gnau zom Aesse im Ristorante. nochäne darf i no es Gelato ha. Mehr fahrid denn met em Zog weder zrog of Brig. Ech darf d'Bilett gä ond zeige.

Mehr fahrid huet of d'Riederalp. Ech darf met em Gondelbähnli fahre. Be jedem Mascht machts e chli tätätäm. Mehr gfallt das. Dobe es min Spelplatz noemme am gliche Oert gseh. Doch sie bauid jetzt en grosse neue Spielplatz. Mer goend denn no ufe zom Alpmuseum. Det hets e paar Loecher, wo Mormeli läbid, doch die schlofid no.

Am Nommitag speli met em Papi dosse ond esse alli Aerdbeerli wo bem Chemine wachsid. Mer goend denn id Taverne go aesse. Ech be ganz en liebi ond esse Chichen Nuggets ond Pommes. Ech darf au vom Mami ond Papi no e chli aesse. Ech chome vo de Frau det no es Seifibloetterli oeber. Met em Papi machi denn s^Fürli ond nehme denn vorem Führ mini Latte.

Da s'hoet e chli rägnet fahrid mehr of Leukerbad. Ech darf hoet go bade. Ech luege is Bad ine ond gsehne denn scho chend spiele. Ech säge grad, dass i det aene wot. Mehr goend au grad i das Chenderbecki. Es het det vel Sache zom Spele. Ond es het 2 Rutschbahne. Zerst machi das numme met em Papi. Denn goni denn grad of die grossi Rutschbahn. Ech roetsche abe ond es sproetzt fescht. Mehr macht das aber Spass. De Papi organisisert mehr denn no fluegeli. Met dene beni vel secherer. Ech wot denn noch guet 2 Stonde au ned usse us em Wasser. Beim Heifahre schlofi grad i ond verwache erscht weder z'Eyholz. Det chaufe mer no oeppis i ond ech darf no e chli im Cooprestaurant spiele. Am Obig beni mued ond nemm mini Milch met em Papi vor em Führ.

Mehr farid hoet in Zauberwald in Aerne. Ech go met em Papi alles go entdecke. Es het det vel Sache zom Spiele ond es het vel Chind det. Mehr machid denn es Führli ond broetlid metenand. Nochäne gfendet de Papi ond ech no en Torm wo mer cha ufechlädere. Ond es het vel Wasser det. Mer gfallt das ond ech wot fascht ned zrogg. Ech schlofe denn bem Heimfahre i. Am Obig goemmer no go Aesse em Camping. Es hed det vel Spielsache ond au es Trampolin. (Beni jo letztes Johr usegheit)

Ech gniesse s'Woerschtli vom Grill.

Ech darf denn no es Glacé ha. Am Obig schlofi denn scho gli i. Ech be mued.

Mer muend weder hei fahre. Es schint sonne em Wallis. So gfallt mir das. Ech be ofem Balkon ond wot en Fotosession.