Ech gone met em Grosi of de Spelplatz en Horw. Det heds en grosse Lastwage. Ech muess det a s Stuer. Wo s'Mami hei chond ben ech no ned de heime gseh. Ech haber weder ned woelle Schloofe am Nomitagg.

Ech darf hoet met mine Eltere a Lunapark i de Allmend. Mer gfallt das grosse Rieserad ond die Sache wo ganz schnell omegoend. Denn duemer met em Grosspapi zäme no grilliere. Ech darf au no bade. Be nämlich ganz dräckig.

Ech gone am Morge zo minere Osteopathin. Ech mache ned emmer so met wie ni setti. Doch sie hed jo gseid, dass ech ganz en schlaui be. Am Nomitag hani no en Termin be de frau Wicki gha. Ech be jetzt knapp 10 Kilo schwär ond be jetzt meh als halb so gross wies Mami. Ech be jetzt 76 cm gross. Ech ge ganz en grossi onderdesse. Ech wot jetzt au Liedli senge. Näb em Capucetto Rosso sengi jetzt au alle Vögel sind schon da. Ech luege deheime au zue, we de Grosspapi Buchsbaum verbrennt, wo met Chaefer voll gseh esch.

Am Morge darf ech of Lozärn. Ech muess foer mech en Pass ha, wenn s'mami ond de Papi met mer wend e chli of Italie. So goni go es Foeteli mache. S'esch loschtig gseh. Ech ha alli aglueget und aglachet. Denn semmer no of Horb ond hend es Kafi gnoh. Am Nomittag beni bem Grosi gseh, well s'Mami, de Papi ond de Grosspapi send go Auto aluege. Em Pilatusmärt beni am Obig no omgheit. Ha e chli bluetet. Doch denn heds dosse Musig gä ond ech ha denn tanzed.

Mer goend no go Gmues chaufe wo mer denn am Nomitag em Garte duend pflanze. Ech luege em Garte gärn zue. Ech ha mini Matschhose a ond gniess es em Dräck met de Schuufle omezspiele. Am Obig blieb i bem Grosi well s'Mami vom Papi zom Matzch iglad worde esch. Drom liest sie mer us Büchli vor oder zeigt mehr vieli Sache.

Hoet esch Muetertag. Ech stoh scho am 0515 Uhr uf. Well mi s'Mami holt, schloofi denn em Bett vom Mami ond Papi weder i, doch ech nehme alle Platz eweig. Sie muend am Rand liege. Denn ged mer s'mami 3 Rose wo ni em Grosi darf brenge. Sie hed Freud. Sie wot mis Chleidli no glette.

Denn goemer of Emme ond nehmid bem Gotti en Brunch. Ech esse vel Ruehrei, doch es Rägnet dosse ond mer choend nued dosse mache. Erscht am Obig goni met em Papi no in Garte ond er lod mech denn no lo sändele. Mer badid jo denn später no.

S'Gotti hed Gebortstag. Ech go scho am Morge of Aemme well s'Mami no en Termin bem Rösli hed. Ech sprenge de ganz Tag omenand med de Naomi. Mer tschuttig sogar meteand ond au met em Zio Massimo. Am Obig fire mer denn s'Gotti.

s'get Pizza vo de Nonna. Mhhh.

s'Gotti darf mech mol chorz of em Arm bhalte.

Ech schloofe scho bem Schoppe i ond denn deheim weckt mi au no s'Grosi, well sie ned gshe hed, dass de Papi mech of em Arm hed ond sie em no Sache hed woelle säge.

Hoet chomi scho am 6i uf. De Papi ged mer z'trenke ond ech schloofe no e chli. Denn goni no es gschänkli foer de Jonas go chaufe. Am Nomitag goemmer zom Jonas  a sini Party. Es hed vel chend det ond es esch lut. Ech gebmer Mueh denn au luut zsii.

Ech träge die ganzi Wält of Hände.

Hoet hani ganz schlächt gschloofe. ech be glaub e chli nervös gseh. Doch ech ha hoet en grosse Tag gha. S'Mami hed mi einfach mol ofs Häfi gsetzt. Denn hani mech mol gsetzt ond ha denn det es Buechli aglueget. s'Mami hed mer denn d'Windle wäg gnoh ond ech ha denn s'erscht Mol bisslet is Häfi. Ech fuel mech scho als ganz grossi.

Mer goend am Obig goge schwimme. Ech schloofe das mol ned i ond de Papi wirft mech fascht en Meter übers Wasser ond fot mi weder uf. Morn darf ech id ferie. (Weiss zwar ned was das esch)

Am Morge goemer go ichaufe. Denn packid s'Mami ond de Papi vel Täsche ond verstauid alles im Auto. s'Grosi tued e chli zo mer luege. Sie spelt met mer. Am Nomittag semmer denn abgfahre. Ech ha chorz vor de schöllene noeme moege ond be igschloofe. Mer send denn met em Autoverlad is Wallis gfahre. (S'hed en Realp gschneit ond au en Oberwald) Em Wallis beni denn verwached ond ha Honger gha. Gli druf abe semmer denn em Feriehus vom Grosi ond em Grosspapi acho. Ech ha alles muesse entdecke. Ha mech noemme choenne erinnere, dass ech letzts Johr als Chlini scho mol do gse be. Es hed ganz vel neus zentedecke. Am Obig darf ech em Nick sim Reisebettli schloofe. De Papi esch ganz happy. Bayern Münche hed Championsleague gwonne.

Nochem zmörgele hani met em Papi Buechli aglueged. Ech ha denn oebere Mettag no chli gschloofe. Denn semer of Brig ond hend en Spelplatz i de Noechi vom Aldi gfonde. Das hed ganz vel Chend det gha ond ech ha woelle go tschutte.

ech esse en Oepfel. Glaub ech be chrank.

Am Obig semmer no go aesse e de Taverne. Det hed mer de Wert en Täller Teigware mit Tomatesauce gmacht. Denn hani no es Pommes Frites vom Papi chlauet ond e chli Fleisch.

Am Morge goemer of Brig go ichaufe. Ech darf denn au bem Stockalperpalast of eme Spielplatz spele. Denn goni hei go schloofe ond am Nomitag darf ech s'erscht Mol met eme grosse Bähnli fahre. Mer goend of d'Riederalp. Das esch en grossi Bahn wo ganz wiit ufe got. Denn hets no e chli Schnee omegha, doch d'Sonne hed gschine. Ech ha bem Chapelleli denn en Spielplatz gfonde. Ech ha alles muesse usprobiere. Denn hani no zobig gno amene Holztesch. Gemein vo dem, dass er mer denn 2 Spiesse i mini Fingerli ine gmacht hed. Ech ha denn nochäne no zom Doktor muesse. Er hed mer alles aglueged. Mer hend sie denn aber denne glo. Sie chäm denn scho wieder use. Uf dä Schräck hani nochäne en ganze Pouletschänkel vom Grill muesse aesse ond au no e chli Brotworscht.

ech spele ond s'Mami spellt met. Hinde hets no Schnee gha.

Mehr gond im Verlauf vom Morge noch Ernen. Det hets en Zauberwald. Ech schloofe zerscht no em Auto ond s'Mami versuucht mer mini Spisse useznäh. Eini cha si glaub usenäh. Denn Darf ech im Wägeli of eme Wäg dure Wald go. Es het denn en grosse Grillplatz. De Papi macht Füür ond denn chond no en Schulklass. Ech wot mit dene Spiele. Ech entdecke Tannzäpfe ond das es e chli unäbe esch do omezlaufe. Es wendet au. Nochäne gehts ändlich oeppis zässe. Ech esse fascht 3/4 Brotworscht noch em Gmues ond de Teigware wo s'Mami metgnoh hed. Ech setze of em Tesch ond mer gfallt das. Mer spielid no e chli ond denn goemmer hei. Ech schloofe denn de heime e chli. Da s'no warm esch goemmer no go Coupe aesse em Restaurant Tunetsch. Det hets vel Chend ome ond ech ha en Traktor zom spele entdeckt. Denn hani au no es Chendertrampolin gfonde. Ech ha em Papi fascht ab choenne om det sälber omezgumpe. Hoet hani vel erläbt ond be bem Schoppe trenke igschloofe.

fascht hätti choene chips claue. Doch sie hends gmerkt.

Ech has met em Papi gnosse i dem Wald. Es het vel zom Entdecke ond spele gäh.

Am Morge gehts en Oeberraschig. Es schneit dosse. Ond es hed die ganz nacht vorhär grägnet. Mer brengid S'Mami of Brig zom Coiffeur. Denn fahrt de Papi met mer hei. Ech schloofe i. Er god no id Metzg go ichaufe. De Papi muess met mer em Auto warte, well ech no wot bis noch de 12e schloofe. Denn essemer zäme. Ech chome au e chli Schnitzel oeber. Denn luetet scho bald s'Mami a ond mer goend weder of Brig sie go abhole. Denn darf ech of Eyholz ine Megastore. Ech fende ichaufe jetzt cool. Mer goend no is Restaurant ond det hets en spielplatz. Deheime chocht de Papi foer ues alli ond ech esse au bem Gschnätzlete no mit.

Mer nehmids hoet e chli gmuetlicher. Doesse schint zsonne dur Wolke doere. Mer Zmoergelet zäme ond de Papi macht woesch. Ech schloofe am Morge no einisch. Denn gomer no veruse go Bluemli aluege. Am Nomittag goemer of Brig abe. Det gets en wiitere Spielplatz direkt nebe de Bahnstrecke am Damm vo de Rhone. Ech entdecke jetzt au dae Spelplatz. Es het vel chend ond all paar Minute chond en Zog verbi. Ich muess denn emmer luege. Mer goend denn no chorz hei ond am Obig darf ech met is Restaurant Eidgenoss zom Steak aesse. Ech chome aber zerscht Buchstabesoppe oeber. De Wert macht s'Fleisch direkt oeberem Fuer. Ech chome denn vom Papi e chli Rindfleisch oeber ond vor allem darf ech au e chli Pommes frites aesse. Dosse duet s'Fähndli rächt starch wende. Mer goend morn ned of Domodossola. S'Wätter esch zu schlächt. De Papi fueret deheime weder, dass ech ned z'chalt ha.

Mer choend am Morge id Beckerei go zmorge aesse. Ech fende das cool. Es hed ganz vel Fraue det wo mich alli duend aluege ond met mer tuend Spass mache. Ech esse em Papi s'halbe Fleisch ewäg ond wot au no vom Brot näh. Ech gfende denn auch no en Spielecke zom omespiele. Nochäne goemer of Brig. Es wendet starch. Ech darf au i Voegele ond mech det ueberall verstecke. Ech schlofe em Wage vor em Mittag i. I de Buchhandlig beni aber weder wach ond ech gnuesse die Buechli wos det hed. De hets au en alti Postkutsche zom spele.

Ech darf denn no Safranteigware go aesse. Ech nehme au s'erscht Mol Salat voräne. De Papi het en Pizza gha. Mer goend denn no hei go schloofe. Mer gniessid dä obig im wallis. Deheime rägnets fescht Be üs ned.