Höt send de Nonno ond d'Nonna verbi cho. Sie send med em Papi ond mer go laufe. De Nonno hed stolz de Chenderwage gstoose. D'Nonna hed denn erscht die 2ti Rondi doeffe mache. Denn hed d'Nonna no zo mer glueget. De Papi esch e chli go schloofe onds Mami hed Therapie gha. Ech ha hoet vel gschloffe de ganz Tag. Interessiert luegi aber emmer am Obig, obs oeppis neus z'entdecke ged.
Ech be go ichaufe, doch ech ha gschloofe ond ned gmerkt, dass i am ichaufe gse be. Am Nommitag esch denn s'Gotti mech cho bsueche. Sie hed mi denn s'erscht mol of de Arm gno ond me send metenand go laufe. Ech mache wiiterhin am Obig Party. Hat zwar au tagsüber jetzt längeri Ziite, wo ni wach be.
Hoi Gotti, säg em Massimo, dass Du au so nes Schätzi wi ech eis be wettisch.
Zwe Schwöstere onderwägs met mer.
Ech wott am Obig eifach me z'trinke. Ech glaub ech bruuch das eifach. Am Obig beni länger wach als Mami wo goht go schloofe, defoer holi si denn i de 2. Nachthälfti usem Bett. Sie muess denn luege. I de Nacht beni e langsami Trinkerin ondha au länger foers Windle wächsle.
Hoet choemid no mini Cousin Timo ond Livio of Bsuech ond schlofid be de Grosseltere. Sie wend mech denn kennelehre. De Timo esch e nätte. Dä hät mer scho Bluemli brocht. Ech schloofe tagsoeber i mim spötere Zimmer. Gäge Obig gömmer no go spaziere. Ech mache gnau zom Wächsel vom Papi zom Mami mini Windle ond aus Body volle. Die münd fascht täglich foer mech wäsche. S'esch cool die so umezjage. Höt beni denn 2 Monet alt worde. Be scho rächt grösser worde debi.
Am Morge hani doeffe e chli bem Mami em Bett ligge ond det mech breit mache. Noch em z'Morge esch denn au de Timo ond de Livio weder verbii cho. De Timo hed ganz lieb met mer gspellt. S'hed mer gfalle. De Timo ond de Livio würdid mech gärn met näh ond mech als Schwöschterli ufnäh.
De Timo luegt ganz lieb zo mer ond spellt met mer.
Hoet muess de Papi wieder go schaffe. So beni met em Mami elei de heime. Mer hend hoet no en Termin be de Frau Wicki. Sie misst mech. Ech be jetzt scho öber 3500 Gramm schwär. Gross beni öppe 49 cm. Ech schloofe fascht emmer am Tag ond am Obig werdi denn onruhig ond ha au kuerzeri Aessensabständ. D'Chrämpfli send halt emmer no do, ned emmer gliich. De Papi hed am Obig no en Termin be de stärnegogger ond so goni med em Mami scho frueh is Bett. Vo de Claudia chomi no es Gschänkli oeber. Danke.
S'Mami god go ichaufe. Ech be au debi, doch ech verschloofe das. Das werd denn scho no ändere. Am Obig luegt denn s'Grosi zo mer, dass s'Mami cha go schloofe ond de Papi hed Stärnwartedienst. vo det brengt er no es Buechli vos Müllers met. Danke, was ech au alles oeberchom. Ech ha scho chli Chrämpfli ond wot noch 2 Stonde scho weder z'ässe.
Am Morge chond em Mami sini Kollegin Debbi of Bsuech. Sie hed üsi Wohnig no ned gseh ond mech au ned. Danke foers Gschänkli. Esch scho schön, so jede Tag oeppis oeberzcho. Am Nommitag esch denn de Nonno ond d'Nonna no cho ond hend zom mer e chli glueged. D'Nonna hed em Mami no em Huushalt gholfe. De Obig hani de ganz bem Papi of em grosse Buuch verbrocht, det chani guet legge ond schloofe.
Hoet beni au e chli mit em Mami onderwägs gse. Sie hed Chleidli kauft, ech ha gschloofe. Am Obig beni wach ond trenke ganz vel innert churzer Zyyt.
Hoet hani en lange Tag met em Mami gha. Am Obig beni erscht spoot zom Papi, doch dä het mi denn bes am Morge am 3 be sech gha, dass s'Mami hed chönne schloofe. Sie hed denn zo mer glueged.
Höt morge chond de Götti met de Melissa chorz of Bsuech. Er hed mi jetzt set em Spetal nömme gseh. Er hed mi denn e chli ghebet. Es gar net so ne Trümmlige we alli meinid.
De Götti med mer.
es schöns Chleidli hani a. Met Stärndli druffe.
Am Nommitag beni bem Papi gse, woell s'Mami Revision vo de Buchhaltig gha hed. De Bärti ond d'Anita send cho kontrolliere. Ech ha denn gschloofed. D'Anita hed mer no es härzigs Gschänkli metgno. Es Chleidli für spöter.
Mer hend hoet muesse go luege, wo em Spitz obe das Büro vo de Muettereberatig esch. S'Mami weiss halt ned so guet, wo was esch. Det semmer go spaziere am See. Am Nommitag send denn nos s'Buehlmanns of Bsuech cho. De Beat esch jo eine vo dene wo do het muesse bezuege, dass s'Mami ond de Papi hüratet. Sie hend mer au Gschenkli brocht ond denn no gseid, dass sie jetzt en Sonne (d'Sara), de Mond (de Yanick) ond ech (Stärndli). D' Irma hed feini Cremeschnette metbrocht. (Chasch weder emol brenge.) Sie hend mech aglueget ond au doerfe hebe. Sie hend gmeint ech seg no chli, doch ech ha jo scho raecht zugleiht. Fürs Bade esch kein Zyyt gseh.
Ech be jetzt oeber 3800 Gramm schwär. De Papi hed mer droht, dass ech uf Diät chome, woell ech 300 Gramm enere Woche zugnoh ha. Frau Wicki hed mech aglueged ond gwooge. Am Nommitag semer no benere Oesteopatin gseh. Sie hed mech berüehrt ond mer gholfe. Sie hed gseid, dass ech ganz vel Wärmi abstrahle tuegi. Ech ha denn am Obig Honger gha ond be denn go schloofe.
s'Mami ond ech hend en langi Nacht gha, do ech ned ha choene rechtig schiessle. So hets mi ständig blooget. Am Nommitag esch denn Tante Rebi met de Naomi ond de Nonna cho. Naomi esch met mer cho spaziere. Am Obig hani doerfe chorz zom Grosi ufe. Sie hed mech be sech of de Bei bem Färnseluuge lo schloofe. Das hed mer gfalle ond ech ha guet gschloofe.
Hoet beni am Morge scho onderwägs gse. S'Mami hed zom Chiro muesse. so hed sie mech zo de Nonna ond em Nonno noch Aemme brocht. Det esch au d'Naomi dehei. Ech ha det vel gschloofe ond truenke. Alli hend mech woelle aluege. Denn semer no go laufe. Det hani no d'Filo ond d'Sabrina gseh met em Samuele. De Papi hed no en Sack Wendle vom Handelsregisteramt obercho foer mech. Fend ech cool, dass ech oeberall oeppis oeber chome. S'cha so wiiter go.
Am Obig hani weder bem Grosi doeffe ischloofe, woell de Papi hed müesse fotografiere ond denn em Grosspapi am PC hälfe. Ech ha denn tüüf gschloofe, bes i weder Honger gha ha.
Ech be em Papi sis Stärnli hed er gseid, wo ner die zwe Fläcke do am Hemmel ufgno hed. (Er hed denn gmeint, dass send kei Fläcke, sondern Planete. Venus ond Jupiter)
Huet hani de ganz Tag s'Mami of Trab ghalte. Sie hed nume em Stoh choenne oeppis ässe. Zom Glöck heds Grosi ehre das brocht. Ech ha gäge obig met choenne go ichaufe. Has aber weder verschlofe. Gemein esch, dass s'Mami ond de Papi no en Pizza gässe hend i dere Zyyt!! de Papi hed denn bes am Morge am 3 zo mer glueged. Denn heds Mami oebernoh für mech.
Am Morge hend de Götti ond d'Melissa mer no vel Chleidli brocht. Danke Euch. De Papi hed mi hoet zom erschte Mol em Manduca ometreiht. Tante Martina hed nes zeigt. Ech ha dete sofort gschlofe. Au bem Mami hani das hoet choenne gniesse. Ha huet au badet. S'hed mer am Anfang gfalle, doch denn hani Chrämpfli becho, well i ned ha choenne schiessle. Erscht gäge Obig hani choenne ond denn es mer denn vel besser gange.
Ech han hoet erscht gäge Morge wieder rechtig gschloofe. Denn hani scho bald Bsuech oebercho. Em Mami ehres Gottechend, de Jonas esch met em Nicolas ond em Mami ond Papi zu üs cho. Sie hend denn zäme gässe. Ech ha zerscht gschloofe, doch denn hani auch woelle met debi sii. So hani halt gluegt, dass ech luut be, bes de Papi mech zo sech nemmt. Mech drueckts emmer no aber ech chan ned schiisle.
Wer send mued gseh. Hend en langi Nacht ga. Aber ech ha denn am Tag choenne schloofe. Am Obig hani extra gwartet met schiisle, bes s'Mam hed woelle is Bett. Denn hani Vollgas gä. Be denn rächt mued gseh. De Papi hed met mer no en Fotisesseion verastaltet.
ech be ganz ufgregt gseh.
ond ha omegspielt. Onderem Stoff of de Siite chame doereluege.
Ech ha de ganz Tag fascht nomme gschloofe, drom muess i am Obig fit si oms Mami e chli z'aergere. Sie het welle schloofe, ech ned. De Papi esch am Match gseh ond hed am Obig ned zo mer choenne luege. Defuer hani em Papi si Platz em Bett übernoh. Sesch schoen gseh emene so grosse Bett z'schloofe. Tagsoeber hend s'Grosi ond de Grosspapi noch Bäumli gsetzt em Garte ond es grosses Tannlli, wo de Papi de an Wiihnachte (Weiss no ned was das esche) werd beluechte.
S'Mami macht e chli Fotene vo mer.
Die ganz Wält liegt onder mer.
Ech be wieder gäge Obig so rechtig wach ond ufgleit. S'Mami esch vorher met mer go Laufe zom Spelplatz bem Altersheim. Am Obig hani so lang omegspielt ond de Papi hed muesse luege, dass ech e chli abe chome. Ech wott jetzt au am Obig emmer chuerz nochenand aesse. Defoer lommer de gäge Morge me Zyyt. Ech ha gluegt, dass de Papi so 2 Stund noemme hed choenne ufstoh. (Ech hami quer of de Buuch gleiht ond de Chopf a si Ellboge glehnt. So hed er muesse bliibe. Er hed defoer doeffe Bayern luege. Ech wachse em Moment zemlech ond go i'd Längi. S'Mami hed de ganzi Tag Chleider gwäsche ond glettet wo sie vo de Nadine ond vo de Luisa oebercho hed. Ech muess bald en groessere Chleiderschrank ha.
Donnerstag, 22. März 2012
S'Mami esch gäge Mettag met mer zo de Nonna ond em Nonno. Denn send au die andere vo de Familie inkl. Gotti det gseh. Sie hend guet zo mer glueget ond ech ha denn au gschloofe. Am Nomitag semmer denn no chorz de Papi bem Schaffe em Ruopige go bsueche. Ech ha weder Party gha am Obig ond ha fascht ned choenne ischlafe.
S'Mami esch früh am Morge met mer uf. Ech ha Dorscht gha ond be denn lang wach gseh. De Papi hed hoet frei ond darf lang schloofe. (Er esch halt erscht am drüü is bett wäge mer). S'Erscht Mol beni höt em Pilatus Märt wach, amu e Teil. Die hend en riese Mänge Windle in Aktion chauft. (ha gar ned gwoesst, dass ech so vel doereloh) S'Mami esch so müed gseh, dass sie esch go schloofe am Nomittag ond de Papi hed zo mer glueget. Er hed denn weder es Foeteli von mer gmacht. Esch scho gemein, was dä alles so gseht
Ech schloofe sogar of em umgekehrte Noggi.
ond en grosse Zeh heigi au meint de Papi. D'Soeckli zini sowieso emmer innert 30 Sekunde uus.
Hoet wäri jo für de Papi de Tag vo de Astronomie i de Sternwarte. doch wäge mer god er das Johr ned detäne. Defoer werde mer en Usflug mache. Ech ha i de Nacht weder emol e chli Party gmacht. Ech be einfach en Nachtmoensch. Me send am Mettag s'erscht mol mit Sonneschotz go spaziere. Denn hend de Papi onds Mami verosse Teschgrill gmacht ond ech be im Kinderwage denäbe gsi ond ha gschloofe. Denn esch denn nos s'Gotti uftaucht ond hed mer es chlises Gschänkli broocht. Sie hed mi denn au trout of de Arm znäh. Denn semer bes Oetterlis en Chriens iglade gseh. Det han ech mech vorgstellt. D'Anita hed freu gha a mer ond au d'Frau Muff esch no chorz of Bsuech det cho. Jetzt koenn ech sie au. Wo mer hei cho send esch deheime es Gschänkli gsi. Fend i cool, dass ech au 9 Monet vor Wiihnachte schon gschänkli bechomme. Send mini erschte Lego gsi. Weiss ned, oeb de Papi oder ech meh Freud am Gschänk vos Stadelmas het.
Ech ha die ganz Nacht ab de Zytumstellig keis Aug zutoe. Ech be z'fest beschäftigt gsi. Ech has Mami demet of Trab ghalte. Da i scho me als e Tag noemme ha choenne schissle, beni e chli schlächt glunt. Bem Bade hani aber länger aenegha als soescht. Spoeter beni met em Papi no in Garte. Er het mech em Manduca treit. Ech choemme au no es Boimli oeber. Heut hets s'erscht Mal be mer es Tränli gä. Die choemid jo ned vo Anfang a, sondern erst spoeter. Ech ha woelle sofort aesse. Das esch halt ned ghange, so hani halt bruelled. Am Obig esch denn s'Grosi wieder zrogg cho vom Wallis. De Papi ond ech hend sie bsuechet. Det hani choenne görpse ond au schiessle. denn es mer vel wohler gseh.
Au ech cha scho Tränli ha, weni ned alles grad bechome woni wott.
Well ech am Obig gschesslet ha, hani bes fascht am 2 gha, bevor ech weder tronke ha. Denn hani fascht die ganzi Nacht nuemme g'schloofe. Am Morge hani de ganz Morge gschloofe, au wenns Mami met mer esch go laufe. Am Nomittag hani no en Termin be de Osteopatin gha. Ech ha gschloofe wärend dem. Defoer beni umso lebendiger am Ogib gseh ond ha ometoebet. Ech ha denn au me als es Fläschli woelle trenke ond ha 210 mm putzt. Erscht ab de halbi elfi beni igschloofe ond denn hani lang gschloofe.
Nochdem i die 2. Nachthälfti fascht wach gseh ben, hani denn halt am Morge gschloofe. Am Obig esch s'Grosi cho luege, well de Papi hed muesse fotografiere. Er hed defoer e paar Planete ond de Mond ufgnoh. Ech ha e chli Chrämpfli gha, doch ha denn glich no gschloofe.
De Papi hed mer verzoellt, dass das de Jupiter, denn oberhalb d'Venus onds helle de Mond sigid. Ech glaubem das jetzt moll.
Hoet legi am Morge bem Papi sim Platz em Bett. De sell go schaffe, ech be jetzt die grossi do im Bett.
Em Papi sis Choesi hed vel Stärnli drofe ond ech be sis schoenste Stärnli. Cool gseit, gäll!
Spoeter het mi de s'Mami of Chriens brocht, wom Herr Dr. Bütler. De hed mech kontrolliert ond gmeint, dass ech ganz gsond be. Denn hed er mech gmässe. Ech bi jetzt 53 cm gross ond ha rächt zugleiht. Ech be jetzt 4550 Gramm schwär. Denn hed er mech 2 x müsse Pikse. Ech ha mini erschte Impfige becho. Ech be tapfer gse, ha aber be de 2. de e chli muesse bruele. S'Mami au fascht. Drom esch s'Grosi met cho om üs zonderstütze. De Nick esch denn au no cho. Hoet send d'Schiltkrote s'erscht Mal nochem Winterschlof wieder omenandglaufe. Die werdid mech denn die noechste Johr begleite. Ech be am Obig e chli komisch gseh. Dänk wäg de Sproetze, doch huet hanis gärn gha, bem Mami oder Papi mech azchueschle ond det i zschlofe.
Ech ha es chlises doerenand noch de Sprötze vo gester. Be e chli usser de Zyte ond au d'Mängi vom Trenke stemmt ned so ganz. D'Nonna ond de Nonno send chorz do gsi. Ech fange jetzt a spiele met em Mami. Cha au fascht scho lache.
De Papi hed hoet no frei gha, so hed s'Mami zom Chiro choenne go. Denn eschere no eres Auto kapott gange. So semer halt spoeter go ichaufe ond ech ha zom erschte Mol det au zuglueget. S'esch en schoene Tag gseh, so semer au no go Spaziere. Ech be emmer no e chli durenand wäg dene Sprötze vom Mettwoch. So hani de ganz Tag en 2 Stunde Rhytmus mit Aesse. De Papi luegt bis spot i de Nacht zo mer. Denn uebernemmt denn weder s'Mami.
Am Morge beni scho früeh wach gsi. Mer send denn am Morge no of Rotheburg ond hend det s'Buehlmanns troffe. Sie hend mi alli woelle aluege. Denn semmer wiiter om de Nadine go z'gratuliere. S'Esch Mami vo de Melissa wo em Papi sis Gottechend esch. Det hets no vel luet gha ond jede hed mi woelle alluege ond hebe, doch ech ha einfach gschloofe. Am Obig hed s'Mami serschte Mol wieder doeffe i Usgang. Sie hed Debi ond d'Diana troffe. De Papi ond s'Grosi send met mer go laufe. Ech ha im Wage gschloofe, doch defoer hani nochäne woelle 210 ml trinke ond 2 Stond spoeter au no einisch 170 ml. Denn hani fescht gschloofe.
Ech be de chli Baer. De Papi esch de grossi Bär.
ech mache scho e chli de Chasperli met em Papi. Go mi go verstecke.