Hoet muemer weder heifahre. Ech helfe bem Puetze. Ech wot met allne loempe abstaube. Mer hend Mueh mis Bettli wieder zäme zmache. ei Egge chlemmt e chli. Mer fahrid weder hei. Ech luege interessiert zu bes mer of de Bahn send wo i Tunnel gohd. Denn schlofi i ond verwache erscht weder wo mer de heime achomid. Es hed gruusig grägnet onderwägs. So hani halt gschloofe. Deheime esch mi s'Grosi cho bsueche. Ech ha muesse of si zuspringe ond in Arm näh. Ha si rächt vermisst. Denn hemmer no met ehne doerfe go aesse. Mer sind is Strandbad Wenkel gange. Det hed es fuuer brennt ond ech ha alles woelle go alluege. Ech ha denn ganz veli Aentli gseh dusse. Ech ha au doerfe oeppis mitaesse ond vel bem Grosi si. Ech be erscht spoot is Bett cho.

Ech ha deheime weder choenne all mini Spielsache begruesse. Denn hani no uesegfunde, dass mer met em Waegeli, wo mer de Goetti gschänkt hed cha omenandfahre. Mängisch vorderzi, mängisch hinderzi. Ech ha jetzt mini Puppe i dä Wäge gleiht ond fahre i de ganze wohnig umenand. Ech go denn au no go d'Schildchrotte go aluege. s'Mami muess no vel Woesch wäsche.

Ech darf hoet vel ondernäh. Es esch heiss dusse ond mer essid zäme no zmorge. Noch em Schloofe darf ech met em Mami ond Papi i'd Chrienseregg go. Met em Bähndli darf ech fahre. Ech luege interessiert use ond gseh Gleitschirmflueger. Denn heds ganz en interessante Spielplatz. Es esch au do heiss, doch de Papi zeigt mer alles. Ech be no chli om alles zmache. Aber met em Ritiseili hani scho guet choenne spiele. Es hed ganz vel Chend do gha.

ech be scho ganz en grosi. Ech cha Ritiseile ond glich au no omeluege ond sälber aghä.

Ech esse denn min ganz Oepfelbrei. Denn chlaui em Papi no vo de Cervelat. denn essi em Papi de Oepfel no ewäg. Mer gfallt das do obe. s'noechst Mol choeme mer fruecher. Nochäne semmer weder of Chriens gfahre. E Ma hed ues gholfe bem Istige is Bähndli. Bem Heifahre beni fascht igschloofe. De heime esch no d'Sonja ond de Markus Amrein of Bsuech gseh. Sie hend denn aber muesse go. Ech aber ha denn doerfe go bädele i mim neue Pool dusse.

mini erschti Glacé. Das esch aber fein gshe.

Ech ha alli rundume met Wasser muesse bespruetze ond ha fascht noemme woelle usecho. De Papi hed näbedra de Grill agworfe ond mer Pouletschänkel choched. Ech ha denn au en ganze gässe. Denn hani no Boehndli ond Ruebli em Papi usem Täller chlaued. Zom Abschloss vom Tag hani no doerfe a mene Glace schläcke. Mhh esch das fein gseh ond ech ha em Papi fascht de ganzi Teil vom Cornet obe wäggässe. Schoen esch gseh, dass ech bem Aesse s'Grosi ond de Grosspapi au debi gha ha. Ech be denn fescht mued gseh.

ech ha jetzt min eignig Pool. Esch das cool.

hoet hemer zom letzte Mol Babyschwemme. Ech gniesse das ond gompe denn is Wasser ine. De Papi hed mi a de Handglänk. Denn hani choenne ofere Matratze ometorne im Wasser. Es hed mer so rechtig gfalle.

Ech chome Bsuech vo de Naomi oeber ond denn goemer go s'Gotti bsueche wo i ne neui Wohnig zueglet met em Massimo. Ech muess das alles aluege ond au go luege ob sdet Spelplätz hed. Nochäne goemmer weder hei ond ech darf met de Naomi no i Sandchaschte go spiele. De Papi chond au hei vom Zoegle ond macht no es Fuer. Er choched für ues alli (au foer d'Naomi ond d'Tante Rebbi). Denn darf ech no met de Naomi zäme bade. Das esch en Spass.

en so en grossi Badwanne foer ues zwoi zäme. d'Naomi esch wie en grossi Schwoester foer mech.

Uebrigens hani no en ganzi Minipralinato gässe. Ha serscht mol eini gha, doch das hed mer passt.

Hoet goemmer no chli go Laufe ond go spele of Horw bevor denn de Räge chond. Ech darf met em Papi of d'Rütschbahn go. Ech schloofe oebere Mettag ond esse ned so vel. De Papi schrubet mer en neue Stuuhl zäme. Ech cha jetzt det denne hoeckle. (Ech wot emmer ufstoh, doch das hed s'Mami ned gärn gha) Ech neme mer es Buechli ond ben en grossi. Ech lese scho em Mami vor ond zeige alles i mim Wimmelbuch.

Ech be scho en grosi ond ha min Läsestuehl.

Mer goend nochäne no go es Kafi nä is Fälmis ond ech darf en Waffle vo de Glacé aesse. ech onterhalte alli Luet em Restaurant. Denn esse mer no zäme znacht.

Ech ha hoet doerfe zom Zwärgekaffi go. S'Grosi esch au met cho. Det hets vel Chend gha. Nochäne semmer no go neui Schueli chaufe em Loewecenter. Bem heifahre hani friedlich gässe em Sitzli ond denn esch plötzlich en Floige cho ond hed sech of mis gsecht gsetzt. ech be ganz fescht verschrocke ond s'Mami hed muesse s'Auto ahalte. Denn hed sie muesse em Papi aluete, well ech noemme ha welle mitfahre. De Papi esch denn nach gut 30 Minute met em Auto vom Grosi cho ond hed mech abgholt. Met em Papi beni hei gfahre. Met em Alfa vom Mami hani noemme woell e fahre.

Ech setze jetzt teilwis sälber ofs Häfi ond cha det Bisi mache.

Ech ha am Morge s'erscht Mol Stella gseit. Es hed zwar e chli wie Tella toent, doch de Papi ond s'Mami hend Freud gha. Nochäne sind den alli of Bsuech go. De Timo ond de Livio, de Nick ond alli Eltere. Mer hend dosse Brunch gässe. Ech ha ganz vel Trübeli usem Garte gässe ond de hends mer no zeigt, wie ich die selber ab em Busch cha abenäh ond is Muul stecke. De Grosspapi hed mer no Ruehrei gmacht. Denn hets no Roesti ghä ond Fleisch hani au no gno. (Es Cippollata foer mech) Ech ha em Papi no e chli vom Gipfeli chlauet. Zom Abschluss es s'Grosi denn no go en mini Pralinato hole. Hm, das es en feine Tag.

Nochem schloofe ond sändele hemmer denn no brötlet ond ech ha weder choenne aesse. Am Obig beni denn aber mued gseh vom omespringe met mine Cousin. Die hend choenne of de Baum chlättere. Ech ha nome interessiert zuglueget. Ech muess jo lehre, wie mer das macht.