Hoet esch en warme Tag dusse. De Papi lueget am Morge zo mer, well s'Mami für mech i d'Apothek muess go. Denn chond en Kolleg vom Papi cho luege wägem Venustransit. Sie probieret oeppis us. Ech go met em Mami no einisch i d'Apothek. Denn de heime tuemer no grilliere. Ech chome zwar nome Melch oeber, doch ech darf e chli im Garte spiele. Am Obig goemmer no go Laufe ond ech schloofe i. Doch am Obig beni hell wach ond schloofe erscht noch de 10i i.

ech luege de Garte vom Grosi a.

Hoet dorfid s'Mami ond de Papi e mol foer 2 Stond zäme weggo. S'Grosi ond de Grosspapi lueged zo mer ond spellid met mer. Ech be emmer no verschnopft, doch ech mag weder spiele. Mini Eltere sind denn wieder vom Mövenpick heicho. Ned emol en Glacé hends mitbrocht. Das esch gemein. Ech ha hoet em Verlauf vom Tag no doerfe baade. S'esch  bald e chli eng i dere Baadwanne für die Chline. Muess jetzt denn i die grossi wächsle. A jo, hoet beni scho 5 Monet alt, doch 2 muess mer jo do no abrechne well ech z früh cho be.

Ech gone met em Mami e chli go shoppe i Pili. Das esch no loschtig. Denn gniesse mer de Tag no deheime. De Papi esch am Obig au do. Ech be e chli komisch ond wott sehr vel am Obig äesse, doch denn ned go schloofe. Wie so sell i au go schloofe.

Mer goend no einisch zom Doktor. De dr. Bütler esch ned do, drom lueged en Frau zo mer ond seid, dass ech eigentlich guet zwäg be. Ech ha eifach no dä Hueste, wo eifach ned wot wäggho. Ech muess jetzt emmer no Zäpfli näh. Vellecht helft jo das au. De Papi esch ganz nervös, dä tued sis Auto lade met vel Cheste. Er wott i de Nacht go Stärnli luege, doch s'Wetter macht ned so med. Er würd doch besser sis Stärnli aluege wo ner deheime hed.

Ech chome am Morge so noch de 6e. Denn wot i trinke. de Papi esch ned ome. De fahrt dor die halbi Schwiiz um die Venus vor dere Sonne azluege. s'Mami luegt auch chorz use, gsehd aber nüüd. So gäg die 10i chond den de Papi hei. Er esch truurig. Er heds ned choenne beobachte. Defoer chond er denn met mer met go ichaufe. Ech schloofe em Chenderwage ene. Aber numme chorz. Choent jo oeppis verpasse. Am Obig wot i jetzt alle eifach noemme ischloofe.

Ech schloofe bes gäge die 6i, denn hani Honger. Alli muend sprenge om mehr z'aesse zmache. Mer goend denn no is Gschäft vom Papi om z'Propiere, ob mer det choend Chärtli vo mer drucke. Mer goend no chorz ene Beckerei, doch ech chome nued oeber. De Papi grilliert denn deheime. Ech schloofe churz im Huus, doch denn wot ischo wieder uuf.

De Papi muess hoet zo mer lueege. S'Mami god zom Chiropraktiker oder wie dä heisst. Denn chond sie gschwend hei, god denn aber weder zom Coiffeur. So bliibt de Papi hoet de ganz Tag be mer. Am Obig luegid mer no zäme en Fussballmatch.

Ech ha en schwäre chopf ond so muess i me de Hand stöetze.

Hoet gomer no e chli go ichaufe. Ech schloofe em Chenderwage ond denn goemer e chli go laufe. Wott aber emmer useluege, obwohl das verbote esch wenn d'Sonne schiint. Also tueni mol eifach bruele. de chond d'Diana ond de Alex. Diana hebt mech be sech of de Arm. Das gfallt mer. De Alex muess i au scho alache. Früh übt sech, wer wot en Meischteri wärde.

Nochdem ich am 6 i zmorge gässe ha, hani weder gschloofe. Mer send denn go laufe ond ech be scho weder igschloofe. Denn hends Mami ond de Papi gässe. Ech ha au woelle metmache.

Ech ha em Mami sini Gable gnoh ond ha woelle Spaghetti ässe. Ech mache do sehr schnell vorwärts.

Da hoet em Mami ehri Italiener spielid, hani muesse so es komisch Azzurro Ding alegge. Ech ha denn ganz enteressiert de Match met em Mami verfolgt. Die erschtig Halbzyt hani emmer weder probiert zluege. E de 2. hed de Papi denn met mer gspellt. So hed s'Mami choenne en Rueh luegge.

Hoet hani bes am 6i gschloofe, denn hani Honger gha ond gspellt. Mer hend ues vorbereitet ob de stromonderbroch deheime ond hend en Termin be de Mütterberatig gha. Ech be weder gwachse. Ech be jetzt 60 cm gross ond ha jetzt 6950 Gramm Gwecht. Ech esse halt gärn. D Frau Wicki hed gmeint, dass ech au afone zom Zahne. Ech ha denn am Obig au zemli fescht blööterlet ond ha miis erschte Zahnweh gha. Denn hani s'erscht mol es Loeffeli zom Spele becho. Ha zwar no nüüd gässe, doch das esch guet gseh. Ech ha ned woelle rechtig schloofe. Plötzlich hani s'einte Bei quer usem Stubewage us gha. De Papi hed mi denn befreit. Ech ha halt jetzt die Holzstange uf de Siite entdeckt om dete mech met de Fuessli abstosse.

Hoet goemmer zo de Nonna. Sie wott hoet  emol zom Test zo mer luege för en gwoessi Zyt. Sie bruucht au en Agwönigszyt. S'Mami got onderdesse met de Naomi no go ichaufe. Ech darf go laufe met de Nonna ond em Nonno. Er treiht mech au e chli omenand. De Papi muess hoet länger schaffe, so gsen ech en halt noemme bevor ech go go schloofe.

Mer goend hoet e chli go ichaufe. demit chomi au usser huus. ech gniesse das. s'Mami hed mer jetzt muesse es Aentli im Chenderwage amache, do ech eigentlich emmer wet useluuge ond denn onzfriede benn, weni net darf omeluge. Sie wott mi so oeberlischte. Am Obig luegt de Papi no zo mer, do s'Mami e chli wott d'Azzuri luege. Sie spelid wäge demm ned besser. Ech ha emmer no e chli de Hueschte. Das närvt langsam.

Es esch hoet scho schoen dosse. Ech schloofe lang am Morge. Ech trenke weder me ond trenke au no vel Tee dezue. Ech leere vel. Ech cha jetzt scho Sache i de Hände bhalte. Ech ha vom Mami au scho es Loeffeli oebercho. Sie esst ehres zmorge ond ech leere, wie mer met dem Loeffeli cha omgoh. Ech glaub das met em Zähndli oebercho vot jetzt scho a. Ech ha ganz vel Speichelfloss ond es macht mer e chli weh. S'Mami hed en salbi. Ech ha scho usegfunde, dass wenn sie die wot gäh, dass ech die cha abschlecke. Schmoeckt no guet.

Ech darf scho en Loeffel hebe.

Ech chome am fruehste Sonneufgang natürlich au ganz früeh. Ech wott scho am 6i min Shoppe ha. Denn schloofi no e chli ond mer goend denn no i Pilatusmärt go ichaufe. Es het det ganz vel Bunti Sache wo mech interessieried. Ech ha Honger becho ond sie hend mer e chli Tee choene ghä. So beni usem Wage cho ond hat die farbige T-Shirts det choenne aluege. Ech ha scho woelle bunti Sache em McPaperland alänge. Das esch enteressant. Es esch hoet sehr heiss ond so goni no e chli cho pfuuse. De Papi hed mer es Zält boet met em Grosspapi zäme ond ech cha doesse am Schatte spele. Denn essemer no met em Grosi ond em Grosspapi zäme verusse. Ech schloofe em Chenderwage i. Nochäne goni met em Mami no go Rose abschniide. Ech be mued ond schloofe i.

De Papi hed höt muesse go schaffe. Sie hend do e de Schwiiz abstimmige. Er muess det d'Systeme kontrolliere ond hälfe. Defoer chonds s'Urgrossmami ond de Franz ond de Juli of Bsuech. Ech ha Freuid au det osse doeffe zsi ond vel neus zgse. S'Mami hed mi i Chenderwage to. Det esch en Fleuge of Bsuech cho. Ech ha das enteressant gfonde. S'Mami ned e so. Sie hed fascht en Schock gha ond die woelle vertriibe.

Wo de Papi hei esch cho hani gschloofe. Nochäne hani met em Papi doeffe i de grosse Wanne bädele. Ech ha mi choenne entspanne. shet mer gfalle, au wenns no chli ongwont esch id dere grosse wanne noch mim chline Plastikchöbel. Anfangs Januar hani no em ene Lavabo Platz gha, jetzt längt da Zöber nomme. Ech wachse! Ond d'Hoor choemid au scho. Jetzt bruuch ich denn mini erschti Kosmetiklinie. Ech muess do früh afoh.

Hoet send d'Naomi met de Tante Rebi ond de Nona of Bsuech cho. Anstatt dass die zo mer luegid, hani zerscht die muesse go sueche. Sie send ergendwo usem Bus usgstiege, wos es Bänkli het ond hend denn noemme gwoesst, wo si send. So beni met em Mami die go sueche. Mer hend sie denn gfunde. Denn semmer zom Spielplatz bem Altersheim gange. d'Naomi hed choenne spele. Ech be z'mued gseh. Es esch extrem heiss gseh. So semmer denn weder hei. S'Mami esch au wieder dete gseh. Denn esch es cho gwettere. Also hemmer ine muesse. Ech ha warm. Ha denn toeffe go bade met e chli Thymian. Das soell de Hueschte wegbringe. Die erschte Chärtli hani auch gschrebe ond send ofem Wäg zo de Post.

ech hab warm. Es esch warm dosse ond mer choend nomme chorz use. Defoer schlofi e chli ond spele vel. Ech ha s'Mami de ganz Tag so fertig gmacht, dass sie vor mer igschloofe esch. De Papi hed mi denn is Bett to. Wells so warm gse esch hani no doerfe chorz baedele.

Hoet morge luegt s'Grosi zo mer. Das esch en Tescht, wenn denn s'Mami weder afoot zschaffe. Leider hani scho am 10i wieder müsse fort. De dr. Büttler hed mi no einisch woelle gseh, well i eifach dä cheibe Huschte ned wäg bringe. Am Obig esch s'Mami met em Gotti go Sache foer mini Taufi chaufe. De Papi hed zo mer glueged ond mech gfuetteret.

Ech fülle das Stubewägeli scho ganz us. Ech ha jetzt entdeckt, dass mer d'Füess of de syte a dene Holz cha ufeha.

Hüt morge tued d'Nonna zo mer luege. Das esch en Test. Sie möchid das rächt guet. Muend aber no e chli uebe. S'mami esch met de Naomi go ichaufe. Ech ha jetzt es eignigs Bettli be de Nonna. D'Naomi hed no Spelzüüg ineto. Mer hends loschtig metenand. Am Obig hani wieder doerfe baedele. Ech gniesses langsam.

Ha eifach ned woelle ischloofe. Has so wit brocht, dass de Papi de halb dütschi Match verpasst hed. Ha eifach weder woelle trenke. ha zwar innert 2 Stund mehr als 300 ml trunke. (Tee und Moulch), doch wenn ich Dorscht ha esch das egal.

Ech schlofe bes am viertel ab siebni. Denn speli em Bettli, de Papi bemerkt mi ond er ond's Mami choemmid uff om mech zfüettere. S'Mami goht go duusche ond de Papi luegt zo mer. S'Mami brengt s'Grosi ond de Grosspapi of e Bahnhof ond nehmt denn no 2 Chueche foer de Nonno vom Pili met. Ech wott eifach ned schloofe. Wieso au. es esch jo Tag ond ech choenti oeppis verpasse. Denn beni denn glich no igschloofe ond ha fascht de ganz nommitag verschloofe. Mer send no go laufe. D'Sonne het emmer Licht ond Schatte gmacht. das esch üsserscht interessant für mech zom aluege.

Ech ha Fotisessions met em Papi. Ech "fresse Dechi".

Hoet hed de Nonno Gebortstag. Ech stoh drom ganz früeh uf. Ech muess doch denn bereit si, wenn mer zom Nonno goend. Gäge Mettag semmer det. Alli wend mech begrüsse. Ech mache weder mol d'essenszyte duerenand. So choend s'Mami ond de Papi ned denn aesse, wenn die andere tuend. Die essid Sugo ond Pasta ond ech chomme nued oeber als Melch. Das chas jetzt scho ned si. Ech schloofe erscht ofem grosse Bett vo de Rebi i. Denn darf i au no em Bettli vo de Naomi schloofe. Gemein esch, dass die denn Chueche tuend aesse ond ech nued oeberchomme. Am Obig esch s'Mami noech am Härzinfarkt, wells is Penaltyschiesse ve de Azzuri goht. Doch die hend en Lauf ond choemid wiiter.

Ech darf hoet nochem Mettag weder zo de Nonna go, well s'Mami de no en Termin be de Frau Muff gha hed. Ech darf met de Naomi spele ond schloofe de. Brenge aber weder die ganz Zyt doerenand. Am Obig wott i erscht spot schloofe.

Hoet muess ech aständig si. De Pater Brändli chond verbi om wäg de Taufi zluege. Ech loose zu, wie s'Goti denn bleich werd, well sie a de Taufi au Sache mache muess. De Götti gniesst das. De Grosspapi hed extra foer mech de Jodelclob organisiert. Die singid denn noh de ganz obig bes ech gschloofe ha i de Garage, woells rägnet.

Ech pläuderle am Morge no met em Grosi. Sie muess denn is Wallis. S'Mami got met mehr go esch Chetteli chaufe wägem Zahne. De Papi choend hoet erscht spoet hei, well d'Melissa hoet Gebortstag hed ond er ehre no es Gschänkli brengt. Sie hends denn guet metenand. Ech halte defoer s'Mami of Trab well i alli 2 Stonde hoet wot aesse.

Esch werd hoet scho sehr heiss. Mer loend d'Store am Morge abe ond denn moechemer ned vel. Ech schlofe vel ond trenke no vel Tee. Ech schloofe erscht spoot am Obig i, doch am 3 am Morge hanech Teatime. Ech ha Dorscht. Es esch halt so warm gseh dosse. (De Papi meint en Tropenacht, kei ahnig, was das weder esch.)

S'Mami ond ech verchrüchid üüs i de chältischte Bereiche vo de Wohnig. Das esch Schloofzemmer vo ehne. Dusse esch es über 30 Grad ond das macht mech mued. Gäge obig gwetterets denn e chli. Ech darf no i Pilatus Märt. Mehr chaufid foer d'Taufi i. hoet schloofi aber scho bald weder i. Jetzt gniess i s'Träume vo chalte Zyte.

Hoet chond s'Gotti zo mer ond hoelft met em Massimo zäme alles vorzbereite. Ech cha morn a mini Taufi go. Denn gehts de no oeppis zässe do be üs deheime.

Ech cha no e cli go bade om suuber zsi. S'Gotti zeigt mer mini Cherze ond nemmt si sicherheitshalber met. De Grosspapi ond s'Grossmami choemid auch noch verbi. Sie send em Wallis gsi ond choemid extra wäge mer verbi. De Papi verzechtete schwären Herzens ofs Füürwerk i de Stadt ond luegt zo mer ond onderstötzt s'Mami be de Vorbereitige.