mer goend am Obig go en Coupe aesse. Die vo de AGL hend es träffe gha. Ech ha den doerfe Rahm aesse ond ha no vel Truebeli mitgnoh ond gässe. D'Sarah ond de Yannick send au det gseh ond ech be met ehne zämme omegspronge.

ech sprenge gaern omenand.

Hoet darf ech met de Naomi ond de Tante Rebi i Tierpark of Arth-Goldau. Chuem semmer det, gseni au scho die erschte Rehli ond sprenge grad of sie zue. Die send oeppe glich gross we ech.

Ech go a d'Gländer ond luege oeberall ine. Mer goend denn go Grilliere ond ech vertelge en ganzi Brotworscht foer mech allei. Mer hende denn no de Cousin vom Papi troffe de Dani met sine Chend ond de Carmen.

Ech schloofe denn no e chli im Chenderwage. Drom muess de Papi mit mer no bes zom Baereteil laufe, dass ech en ruh cha schloofe. Nochäne hani no doerfe go baedele be dem chline Selli wos so omesprötzt.

S'Mami hed zerscht ned woelle also hed de Papi muesse inecho. Am Obig hemer deheime no grilliert ond ech ha denn choene träume. Mini Baggezähndli moechid halt jede tag schmärze, so dass ech ned ha choenne doreschloofe.

Ech go am Morge scho e chli veruse go spele. Am Nomiitag darf ech weder mol zo de Frau Wicki. Ech be jetzt 10.5 kg ond ganzi 79 cm gross. Das heisst, ech be weder 3 cm gwachse. Ech go am Obig no met em Papi i Garte. De goemmer natürlich zo de Truebeli. Denn zeigt mer s'Grosi no, dass es Bluemechol hed. Ech go au a de blueme go  schmoecke. De Papi nemmt foer mech no Broccoli usem Garte. Ech schloofe hoet guet i, wel i zemli mued be.

Ech darf met em Grosi ond em Grospapi e chli of Horb go. Det lueg ech mech ume. Denn goni met em Grosi i Garte. Ech muess gnau go kontrolliere ob oeppis neus im Garte esch. Es hed Blumekohl (ech go emmer go d'Blättli ufmache ond ineluege), denn gehts de erschti Zucchetti, mer hend Broccoli, mehr hend Ruebli, mer hend Fänchel ond ganz vel Trübeli. Ech holi di Truuebeli sälber ab em Struuch ond setze denn of d'Stäge om z'ässe. Mer gfallt das. Ech weiss jetzt au, dass mer Heubeeri hend ond wo die send. Ech darf au no go bädele dosse met em Grosi. Am Obig beni ganz mueed.

Ech begrüsse am Morge d'Naomi ond spele denn de ganz Morge met ehre. Mer essid zäme znueni. Ech schloofe denn e chli ond nochäne darf ech met de Naomi go baade. Das gfallt mer. Ech werde debi so mueed, dass ech be de Nonna ischloofe i de Arme. Am Obig goni met em Papi no i Garte om no e chli Truebeli zhole.

Ech gratuliere em Papi am Morge. Ech drückne nämlich fascht usem Bett use. Er wir jo langsam alt. Tagsüber beni of em Spielplatz ond ech schloofe e chli. Denn goemmer no go baade ond ech darf am Obig bem Grosi bliibe. S'Mami ond de Papi goend go aesse. Wo sie denn hei choemid, ben ech no ned em Bett sondern sprenge no dusse ome.

Ech lehre vom Grosi, dass mer zo de Heubeeri chond, wemme s'Netz tued luepfe. Mer goend in Pilatusmärt ond ech schloofe em Chenderwage i. De Papi chauft i. Hoet choemid no d'Nonna ond de Nonno of Bsuech. Sie ond s'Grosi ond de Grosspapi send zom Aesse iglade. De Papi macht es grosses Fuer ond versucht no met em Grosspapi es Muggegitter inezmache. Denn duend die beide grilliere. Ha ghört das heiss Tschh-Tschh. Ech go lieber met em Grosi no e chli is chline Bassin dosse ond gniesse s'Wätter. Ech darf denn met mine eltere zäme znacht ässe ond esse fascht en ganze Pouletschänkel. Nochäne nehmi no die Chnoche vom Kalbsrack ond versuche die abzgnage. Ech zeige denn e de Nonna, was mer foer Gmues im Garte hend ond auch was so soescht no wachst. Denn gehts Glacé ond ech muess natürlich au devo aesse. Ech schloofe denn i, aber ersch noch de zähni am Obig.

Ech spele am Morge met em Papi verosse. Mer goend au no in Garte go luege was so wachst ond pfloeckid no Beerli. De Papi god a Match ond denn chond devoer d'Naomi met em Mami ond de Nonna of Bsuech. Mer badid zäme ond hends loschtig. Am Obig gehts no Brotworscht ond Pommes. Ech chlaue die direkt us de schoessle.

ech mache s'Mami so rechtig fertig.

s'Mami mag noemme ond ech ha d'Kontrolle oeber d'Färnsechäschtli.

Hoet darf i erscht mol i nes Freibad. Met em Mami goni am Nommitag is Mooshüsli, wo d'Naomi au scho gseh esch. Ech ha Spass dra au wenn mer es anders Chend min chline Spielzüglastwage "chlauet" hed. Doch bevor hend choenne go hani no s'Mami of d'Foltere gspannt. Ech ha fascht 2 Stond noch em Mettag gschlooofe. Met em Papi hani no am Obig em Grosspapi gholfe s'Muggegitter fertig zmontiere. Jetzt choemmer det au rechtig Loefte.

Ech schloofe lang, aber erscht nochdem i i de Nacht no lang gha ha mit mine Zähndli. Die beide Eggzähn koechid jetzt au no. S'Grosi esch do ond luegt zo mer. sie mag mer fascht ned noche, so schnell sprengi dor d'Wohnig doere. Mer goend no zom Urgrossmami is Altersheim. Ech cha spele of em Spelplatz ond nochäni beni die grossi Attraktion em Altersheim. Ech esse zmettag met em Grosi ond em Grosspapi. Denn schlofi lang ond am halbi füfi chond s'Mami jo scho weder hei well s'Grosi is Wallis mues. Met em Papi beni am Obig no dosse ond mer goend i Garte. Det hoel ech bem Sproetze vom Gmues. S'Hed fascht kei Wasser meh im Trog. Ech hole scho vel Wasser foer mini Pflänzli. s'Mami hed mer en Aprikose gsetzt. Mol luege ob die chond.

Hoet esch en grosse Tag. Ech be hoet em Verlauf vom Tag zom erschte Mol ofs' Hafi gange ond ha werklich e paar Böhndli choenne schissele. Noch jedem hani muesse ufstoh ond luege was passiert esch. Ech ha denn wi en Grossi au muesse met Papier potze. S'Mami esch stolz of mech gsi. Wo de Papi hei cho esch ond ofs WC esch hani au of mis Häfi woelle ond ha e chli bisselet.

Mer send denn no go ichaufe. Ech ha muesse doer de halbi Pilatus Märt sprenge ond dor alli Luet dore laufe. Beim heifahre beni aber rächt mued gseh ond be igschloofe. Ech ha noemme gmerkt, wie de Papi im Garte de Schluuch gno hed ond bewässeret hed. Schoescht hätti muesse de Schluuch sälber näh. Das chani au scho.

Ech cha scho am Morge wells warm esch in Garte zom Grosi ond Grosspapi. Sie zeigid mehr, wie mer cha Hardöpfel ustue. Ech darf auch hälfe grabe ond sueche. Das gfallt mer. Mer nehmid die Härdöpfel ond legid sie ofs Gras zom trochne. Denn nemi met em Grosi die zäme ond mer versorgid sie. De Grosspapi macht scho s'Bettli weder frösch om anderi Sache z^Pflanze. Ech ha hoet schlächt gschloofe ond woet ned go schloofe bes am 2 am Nomitag. S'Mami esch fascht am verzwifle. Gäge Obig hani no met em Grosi choenne go bädele dusse. Es esch scho heiss gsi dosse. Denn goni no met em Papi go luege. Be de Martina ehrere Boustell esch en Bagger cho ond sie hend au agfange met eme Loch für Wasser. Mer goend dors Land duere hei zom Türli im Garte. Denn holi no es Rübli usem Bode ond au en Zucchetti muess ich abnäh. Ech be scho en grossi Gärtneri ond zeige em Papi wie ech au d'Härdöpfel usto ha.

hoet rägnets de ganzi Tag. Ech schloofe bes gäge die 9i am Morge. De entdeck i wieder die glesmeti Chappe vo de Susi. De ganz Tag legi die an ond bhalte sie a. Ech go erscht gäge die halbi 5i go schloofe ond denn goemmer no gschell go schueli hole im Pili. De Papi chond hei om sis Auto uszlade, denn morn chonder es neus oeber. Zerscht chonder er aber met mer go Erdberli sueche, denn goemer zo de Heuberi, denn zo de Truebeli ond denn zo de bromberi. Ech esse alles. Denn zeig ech em Grosi no, dass mini Aubergine guet tued wachse. Ech risse no e chli Jät us ond auch e chli Ruebliblätter. Nochäne goni em Grosi go hälfe de grossi Container vo de Gruenabfuhr i Garte abe zieh. Ech ha zugluegt ond hälfe jetzt em Grosi. Ech ben en ganz en Grosi.

Hoet cha de Papi go s'neue Auto heihole. Ech darf denn au grad mol a stür go. Er nemmt mech, s'Mami ond s'grosi met of ene Probefahrt. Ech gsene jetzt vell besser use.

Es chloepft scho überall e chli omenand.