Ech schlofe fascht bis am 8i am Morge, doch den hani Honger. Ech be weder e chli unruhig gseh hoet nacht. ha wol e chli träumt. Ech gniesse s'Mami ond de Papi foer mech ellei zha. Am Mittag chond no de Grosspapi ond s'Grossmami mer es guets neus Johr cho wönsche. Mer fahrid am Nomittag no noch aemme, well de Stanley sini Chappe vergässe hed. Denn goemer det met de Nonna no e chli go laufe. Ech schloofe em Chenderwage i. Nochäne essi no mis zvieri det. D'Naomi esch jetzt au ome ond mer hends no loschtig metendand. Ech stägere scho of das chline Stuehli ufe. Am Obig darf ech met em Papi bade. Ech setzte jetzt fascht elei im Bad. Ech darf s'erscht mol met de Aentli vom Massimo spiele. Ech ha bem abzieh scho sälber agfange gha. Ha scho welli selber i die Badewanne ine. Denn beni em Mami au fascht us de Arme gspronge.

ech be den onderdesse fascht scho es Fotimodell. E guete Vorsatz foers Jahr 2013.

Ech ha gärn schöni Kleider a ond luege gärn id Kamera vom Papi.

Ech chome gäg die halbi achti uf. Ech setze em Bettli ond ruef em Papi. Dä hed ganz fescht Chopfweh hoet. Es stecht em rechtig fescht em Chopf. Mer issid zäme zmorge. Ech wot einfach ned go schloofe. So warti demit, bes s'Grosi met mer god go laufe. Denn schlofi fascht en Stond. s'Mami ond de Papi send no es Kino go Hobbit luege. Ech ha no ned metdoerfe. Bem Aesse hani met em Grosi au gspelt. denn hed de Grosspapi zo mer muesse, doerfe luege. Ech ha lang gha besi igschloofe be. Denn hend mer nochäne s'Mami ond de Papi no s'chreschtbäumli wäggno. Ech be trurig gseh. s'Mami esch denn met em Papi no zo mene Doktor of Lozärn. Sisch Kopfweh esch jetzt setz Silvester do ond es stecht rechtig. Sie hend denn usegfonde, dass er die rächtig Kieferhöhli vollkomme zue hed ond drom alles entzöndet esch. Er hed denn vel Tablettli muesse aesse. Ech be i dere Zit no bem Grosi gseh. Eigentlich beni igschloofe gseh noch em Schoppe, doch denn beni weder verwached und ha noemme woelle schloofe bis mini Eltere heichoemid.

Hoet hani Gebortstag. Ech be jetzt genau set einem Johr of dere Wält on i dere Familie. Ech fend das schoen. S'Mami hed mer Bändeli ufghänkt. Ech wot aber de am Morge ned schloofe. Ech muess doch es Gschänkli uspacke. Erscht gäge Mittag beni met em Mami ond em Papi zäme chorz igschlofe. Denn hemer zäme gässe. Ech ha denn s'erschtmol no Spinat probiert. Das hed mer eigentlich passed. De Brei het Zucchetti ond Suesskartoffle dren gha. Mer send denn no chorz of Horb gfahre. De Papi hed no en Termin bem Doktor muesse abmache ond s'Mami hed no es paar Sache ikauft. Ech be halt em Chenderwage igschloofe. Wo mer hei cho send hemmer noch em Aesse no en Bsuech bem Grosi gmacht. Ech ha denn det doerfe hälfe de Baum usenand znäh. Das hed mer Spass gmacht. Denn beni no go luege was es im Estrich obe so alles no hed. S'grosi ond de Grosspapi send denn zom Aesse cho. ha das komisch gfonde, dass die jetzt be ues issid. Doch esch es loschtig gsie. Sie hend mer no es Buechli brocht wo mer cha Sache alänge of eme Buerehof.

ech tuene scho wi en Grossi. Ech lese jetzt Buecher ond tue mi wiiterbilde.

Denn hani doerfe es Kerzli aluege ond versueche uszlösche.

ech gniesse mis erschte Kerzli of em Tisch ond wots usbloose.

Ech ha denn de Termin vom 21.02 Uhr woni gebore be verschloofe. Be mued gse.

Das esch jetzt also mis erschte Johr do of dere Wält gseh. Ech werde wiiter schriibe, doch ned emmer jede Tag. Ech muess so viel entdecke. Ech versueche jo scho mech met einere Hand zhebe ond omestägere.

Hoet chani mech e chli erhole. De Papi esch ned ganz zwäg. Er hed emmer no Chopfweh. Ech spiele mol met em Büchli vom Grosi. Morn hani no en Party. Drom goemer no go ichaufe. Esch choemid morn vel Luet of Bsuech.

Scho am Morge moechid s'Mami ond de Papi vel Vorarbeite. S'Mami hed Pizzateig gmacht. Sie wot alli ueberrasche. Denn hends no en Chueche bached. De Papi god no en Drükönigskueche go hole. Ech darf vellecht au e chli probiere. S'Gotti macht mer jo no en Torte.

s'Goti hed mer en Torte gmacht met em Schneewittli drofe. Danke Gotti.

d'Naomi, d'Melissa ond s'Mami hend gholfe blose om s'cherzli uszblose.

Am Schloss vom Obig send au no d'Stärnsinger go. De Papi esch met mer em Donkle id Stross ufe gange. det hends es Liechtli ga ond foer mech gsonge. Anderi Chend hend gspelt. Ech ha freud gha ond be mued denn is Bett gfalle. Esch e chli vel gseh hoet.

Wenn i jetzt Aesse esch es grosses Chaos. Ech probiere Teigware, doch die passed mer no ned so ganz. Arme Nonno, wenn er das liest.

Ech stone natürlich scho am 7 i uf. De Papi choched fascht de ganzi Tag aesse foer mech, dass es die ganzi Woche längt. Ech bloderle omenand. Denn chläderi oeberall ome. Em Mami nemi die scho zämegleiti Woesch weder usenand. E de Chochi chläderi am Magic Corner ufe ond denn übers Tuerli zom Chuelschrank. Ech ha Freud a de Maske wo s'Mami ond s'Grosi ufghänkt hend. Mer goend no go laufe. Debi stan ech a de Tuere dosse uf ond bliibe es paar Sekunde stoh. Ech darf am Obig no baade ond gniesse das omesproetze sehr. denn schlofi ganz mued i.

Ech brenge em Mami en grosse Schreck bi. Ech schalte zerscht mol de Färnseh sälber i am Färnse. Ech drücke of das Liechtli. Denn hani usegfunde, wie mer usem Triptrap s'Bei cha awinkle ond det enne ufstoh. Sie hed en riese Schreck gha. Ech hangle mich au em ganze Färnsehmoebel entlang. Am Obig speli no met em Nick zäme. Mer gompid zäme em Bettli. Ech heb mi a eim Händli. De Papi ged mer no zässe, damit s'Mami cha a d'Vorstandssetzig. Mech chamer em Momänt werklich ned eleige lo.

Mer goend hoet morge scho go laufe. Em Altersheim chani met em Papi go Ritiseile. Ech versueche sälber azgä. Debi lueg i no zo de Aentli oebere. Denn goemer no go d'Geisli ond d'Hase go aluege. Ech wot ned schloofe. Nochem Mettag goemer no of Horw. Ech schloofe zerscht em Chenderwage. Denn em Kafi ess ech mis Berebreili ond luege omenand. Ech gruesse alli Luet. Am Obig essid s'Mami ond de Papi no Rendshackfleisch met Gmuesstrreifli. Ech ziehne em Mami si Täller zo mer ond fange a inezbiege. Ech nehme das Hackfleisch met beide Hände zo mer. Als oeb i nuet gässe gha hätti. Debi gseni no de fascht volli Mond ond zeige mehrmals of dä. Nochäne goni no go bade ond sproetze debi s'Mami a. Mer gfallt das. Mued goni is Bett go schloofe.

Ech stone scho am Halbi sebni uf. Es esch jo Sonntig. Am Morge goemmer no go laufe dos schoens Wätter esch. es esch chalt, doch de Papi fuetteret met mer s'ersch Mol d'Häsli em Spilplatz. Ech neme am Mettag au e chli Ruerei. Das esch fein gseh. Am Obig wot i denn au no vom Aesse vom Mami probiere. Sie het no Gmues dete gha ond e chli Fleisch. Ech ha ganz wenig doerfe probiere. Es gseht jedes Mol noch eme Schlachtfäld us, wenn ich am Aesse gseh be. Am Obig begrüss ech ganz haerzlech s'Grosi ond de Grospapi wo em Wallis gseh send.

Ech nehme hoet zom erschte Mol em Mami Teigware usem Täller ond esse si. Denn esi au no e chli Kiri. Wenn de Nonno woessti, dass ech Teigware aesse. Dä wär stolz. (Au wenns nomme Denkelteigware gseh send). De Papi ond de Grosspapi fleckid am Obig no min Rennwage wo en Platte Reife gha hed. So chani weder go laufe. Es sell jo sehr warm wärde i de noeschte Tage.

Ech ha nes neus Zähndli obe übercho. Ech mache s'Mami ganz dorenand. Ech wott de ganz Tag nomme aesse. Sie weiss nomme, was mer alles gäh. Ech go in Zauberwald of Emme go luege. Am Obig speli no chorz met em Papi ond go gos Grosi bsueche. Ech cha scho rächt schreie ond bruele wemmer oeppis ned passt. Defoer chani au lache wenn i wott.

Ech spele met em Grosi. Ech be en Grosi ond cha chorz gos Urgrosi bsueche. Ech spele met velne Sache bem Grosi. Ech esse de ganzi Tag ond ha am Obig glich Honger. Ech spaziere em TV-Möbel entlang ond schalte emmer weder de Färnseh i.

Ech ha jetzt gärn oeppe e chli Chleider a, obwohl das ned emmer loschtig esch.

Ech tanze de ganz Tag med de Naomi omenand. Ech be denn rächt mued gse. So hani weder en Monat gschafft. Am Obig tueni no e chli met em Mami ond Papi kuschle. Ech fo das jetzt au a gniesse.