Am Morge lueted d'Fraue vo de IMC em Mami a. Ech darf hoet es Reisli mache. Sie hend die ganz Nacht mech aneme Spezialmonitor aghänkt ond öberwacht, ob ech no Abfäll mache (Schnuufe, ned scheesle). Do ech keine gha ha ond die 5 Täg fascht döre send, darf ech hoet denn noch hei gho zom Mami ond zom Papi. S'Mami ond de Papi chömed ond brenged so en komische Chorb met, wos mi denn ine tuend. Doch vorher legids mer no sehr warmi Kleider a. Puhh esch das warm gsi. E de Pflegerinne hends no Suessigkeite ond Froecht metbrocht, woell mer Chliine jo astrengend send ond sie drom auch oeppis zom Aesse bruchid. Die liebi portugisischi Putzfrau hed üs au no verabschiedet. Em Left hemmer denn de Dr. Hodel noch gse, wo's Mami operiert gha hed. Doesse hets so komisch kloepft ond tschäderet (Nei, das esch ned em Mami si Alfa gse). Es hed Guegemussige omegha ond komisch verkleideti Lüüt. Scho bald send mer denn deheime acho. Do hani s'erscht Mal gse wo ni jetzt denn deheime be. Ech han es chlises Bettli zom omestosse ond es grosses, wo ni denn spoeter werde denne si. Ech ha es eignigs Zemmer. Alli muend schon noch mine Befehl tanze. Weni Honger ha, denn wotti oeppis, wenn ich gschesslet hat, denn woti gwecklet waerde. S'esch for mech au en Omstellig, doch glaub au foers Mami ond de Papi. Die hend glaub keis Aug zugmacht i de Nacht, wells si emmer foer mech glueged hend.
Es chliises Zeiche foer en spezielle Tag. Am Morge früh esch en Rehbock be üs em Garte gseh.
Ech ha jetzt mis eignis chlises Bettli zom Schloofe.
Nochdem mini Eltere die ganz nacht ned gschloofe hend (Sie hend sech sorge gmacht wege mer) hani mol alles aglueged. Ech Trenke, doch die Fläschli stemmid no ned ganz. Ech chome glaub e chli vel Loft mit oeber. So hani Buuchchrämpfli. Hoet nommitag choemid d'Nonna ond de Nonno verbi. De Nonno trout ned mi znäh. Er heig z grossi Händ vor mech. Devor natürli d'Nonna, wo mech ganz gärn ometreigt. s'Mami esch sehr müed. Doch i dere Nacht schloft sie au no ned me. De Papi cha einfach ischloofe.
Am Morge esch Tante Rebbi met em Gotti ond de Cousine Naomi of Bsuech cho. Am Nomittag no en Arbetskolleg vom Papi wo ganz vell Wendle als Torte brocht hed. De weiss, dass ech vel vo dene bruche. Ech ha emmer no mini Chrämpfli ond mini Eltere hend fast kei Nacht, wo sie ned mech muend Pflege. Defoer schlofids ned vell.
Noch ere lange Nacht met vellne Chrämpfli hani am Morge s'erscht Mol doerfe do deheime Bade. Sie hend mer e Badwanne bereit gmacht. Sesch komisch gseh, doch met de Ziit hanis gnosse. Am Sonntig tagsüber hani gschloofe. Ech be aber denn am Obig halt weder lang wach gseh wäge mine Chrämpfli. Si hend denn mer auch Fenkeltee gnoh om demit d'Möoelch azmache. Doch das hed auch nued bronge. Weiss ned, ob ech eifach zvel Loft vo dene Flaeschli bechome.
Nochdemi i mini Eltere wäge mine Buchchrämpfli die ganzi Nacht of Trab ghalte ha, beni denn am Morge im Bettli wieder am Schloofe gseh. Am Nomittag hend den die blööde Chrämpfli wieder agfange. Fencheltee hed nüd brocht, au ned s'Massiere vo mim Büchli. Sie hend mer au no e chli Flatulex ghä. Das esch fein, smöckt suess. De Papi hed mi am Obig de fascht 2 Stunde em Känguruh gha. So hani kei Chrämpfli gha. Ech trenke emmer zwoesche 100 ond 130 ml.
Au höt Nacht hani mini Eltere of
Trab ghalte wäg mine Chrämpfli. De Papi hed mi vom 5i am Morge bes am
Achti of e Buuch gno ond ech ha det gschloofe. Er hed so ine viereggige
Chaste glueget. Am Morge esch den s'Mami met mer go laufe. Ech ha de
Chenderwage vom Timo ond em Livio chönne oebernäh. S'Decheli vom Tante
Martina esch schön warm gseh ond so ben ech ofenes Reisli gange. Am
Mettag beni denn be de Grosseltete obe gseh, well Handwerker be us
deheime gschaffet hend ond d'Fenster hend muesse ufmache. S hed Raclette
ghä am Mettag. Ech han schoen gschloofet. Am Nomittag esch denn no
d'Frau Wicki vo de Muettereberatig cho. Sie hed mech aglueget ond hed
mer denn en Fussreflexzonemassage gmacht. Sie hed gmeint, dass das denn
oeppis glöoest heig. Denn hedsi mi no gwoge. Ech be jetzt 3010 Gramm
schwär. Hal also e wiitei Etappe gnoh.
Noch dem beni denn wieder em Bettli go schloofe ond ha bes am obig am
sächsi gschloofet. De hani Honger gha ond die neu Fläsche usprobiert.
Das esch jetzt wieder die, wos scho em Spital gha hed. De Papi hed das
ofem Internet gfonde. Am Obig gods Mami go schloofe. De Papi ond ech
luegied Championsleage (oder wie das heisst). Also er luegt ond ech
schloofe im Bettli näbedra.
Die ganzi Nacht hani fascht kei chrämpfli meh gha. Esch guet gseh, dass d'Frau Wicki mech massiert hed. De Papi onds Mami send am Nommitag met mer go spaziere. De Papi hed am Morge muesse go schaffe, drom erscht am Nommitag. Ech ha denn aber wieder Honger gha. Am Obig hani so rechtig Party gmacht. s'Mami esch go schloofe ond bem Papi hani ned woelle ischloofe. Be so bes am 10i wach gseh ond han den ned rechtig tronke. Drom beni denn au am 12 scho wieder cho ond ha z'trinke reklamiert. De Papi hed mer das fascht ned glaubt. S'Mami esch denn am Morge am Zwoi ufgstande ond hed mi gwecklet ond denn wieder gfüetteret. Ech han denn au bes am Morge gschloofe.
Am Morge esch Grosi chorz cho ineluege. Sie hed denn foe alli choched. Da hani ned woelle nachestoh ohnd hami gnau denn gmäldet, wos Mami ond de Papi am Esse gseh send. De Grosspapi hed denn noch es Kaffi gnoh, do sie ehri Kaffimaschine ned hend. Ech be am Nommitag bem Papi gseh ond ha gschloofe. Chum esch aber s'Mami do gsi, hani wieder agfange alles ufe Chopf z'stelle. Ech ha zerst wenig tronke ond be igschloofe, denn hani numme woelle Kanguruh mache. Wendle wächsle hani ned woelle. Ha den glich muesse. Defoer beni Hellwach am Obig bes noch den 10i. Mol luege was mehr alles no so choend astelle.
De Papi muess hoed 2 x zo mer luege, wöll s'Mami muess zo Arzttermine. Wo si hei cho esch hemmer es Usflögli gmacht. Mer send med em Auto gfahre ond denn go ichaufe. Dä Pilatusmärt esch scho gross. Ech ha mi eignig Wage gha. Ha vell verschloofe, doch au e chli omegluegt. Be am Obig denn weder hellwach gseh ohnd ha Party gmacht em Bettli. Wenn i chönt wördi meh trinke. Doch d'Menge esch glaub so scho guet gnueg.
Hoet hani am morge lang gschloofe. S'Mami esch total erschöpft gsi, well sie ab de 2 Dienst für mich gha hed. Ech ha den bem Papi gässe. Er esch denn noch go ichaufe. Ech ha de ganz morge verschlofe. Am Mettag hani mis Aesse weder lutstark igforderet. Be denn sofort wieder igschloofe. Bem Papi am Nomittag hani während em Trenke au no en nass gmacht. (S'wendeli hed ned ganz vertebt) Au alles voll gschiislet. S'Mami hed gschlooofe, so hed de Papi müsse Body wächsle ond mech puete. Mache das alle ned zeifach, i demi mich wehre. Ha denn no Nochschlag bem Aesse woelle. ha denn of de neue Matte gspelt ond be denn och ere Stond em Bettli au igschloofe.
Ech wod mini Fläsche scho fascht selber hebe.
Ech ha scho so en schwäre Chopf, dass ech en med de Hand muess hebe.
Ech ha hoet Badetag. S'esch no e chli komisch das Bade, doch könnti si, dass ech evtl. Freud dra oeberchom. Denn hani no mis erschte Fotoshooting gha. Am Nomittag esch denn au Tante Rebbi med de Naomi ond de Nonna of Bsuech cho. Sie hend met mer gspielt ond mech bestuunt. S'Tante Rebbi hed mech troued hebe. Gäll Gotti du nemmsch mi de au einisch i Arm. Am Obig hed denn de Papi muesse Nachtschicht wege mer mache, da ech halt weder vel Chrämpfli gha ha.
Das esch es komisches Element.
Danke Tante Martina foer die Decki. Ech ha si scho es paar Mol bruucht.
Hoet hani weder emol e langi Nacht foer mini Eltere gmacht. Gege Morge beni denn ganz friedlich igschloofe. Ha aber denn scho muesse mich parat mache. ha hoet choene zom erschte Mol zom Chenderarzt gho. De hed mech denn aglueget. Mini Hueftli sind ok, auch mini Groessi ond mini Bewegige. Ech ha schön zugleiht. Be jetzt 3320 Gramm schwär ond 49 cm gross. Det hets denn auch noch e chli meh Vitamine ghä. Muess aber erscht noechste Mol Impfige mache. Zom Glöck foers Mami. Sie hed e chli Angst gha devor. Ech ha denn weder gschloofe ond am Nomiitag simmer gho laufe.
Hoet hani en Bsuech em Pilatus Märt verschloofe. Sie hend det no anderi Moulch foer mech gsuecht. Sie probierid jetzt emol us, ob das für mech ond mini Chraempfli besser esch. Am Nomittag semmer noch go spaziere zom Altersheim ond hend det de schoen Tag e chli choenne gniesse. Ech ha zwar fascht die ganz Zyyt wieder gschloofe.
Das hät de Papi au nie dänkt vor eme Johr, dass er no einisch en Chinderwage darf omestosse.
I de Nacht send die Chraempfli no do gseh, doch noem so fescht. Erscht wos Mami denn zo mer gluegt hed ab de 2 i de Nacht sends weder cho. Sie hed denn lang muesse zo mer luege. Bem Papi hani vorher voul woelle Trenke. Er hed mer no muesse Zuschlag ghä.
Höt morge hani lang em Bett bem Mami gschloofe. Ha halt bes spoot id Nacht Chrämpfli gha. Nochem Wickle ond Pflege beni lang wach gseh ond ha alles woelle met öbercho. Am Nommitag send mi d'Melissa met em Nick ond Ihrem Mami, de Nadine mech cho aluege ond hend mer wieder e paar Sache brocht, wo ni denn cha alege. d'Melissa hed ehre Goetti weder e mol woelle gshe. Sie hed en lang ned choenne gniesse. Ech geb der ne zwoescheduere scho, doch er esch denn mi Papi.
Ech ha hoet e chli gspielt of de Calimerodecki.