Ech gone zo de Frau Wicki, die hed mi noemme erkennt. Ech be jetzt 12 Kilogramm schwär ond 78 cm gross. Ech rede schoen met de Frau Wicki ond ben en Liebi. Leider hemmer denn ned no choene i Chestenebaum zo de Chend.

Hoet chond de Nonno ond d'Nonna of Bsuech zo merh am Mettag. De Nonno chond Weld oeber met em Papi zäme. Mehr andere nehmid Pasta. Ech darf auch e chli Fleischli vom Papi probiere. Denn goni go schloofe. d'Nonna ond de Nonno wartid bes ich denn weder uf benn. Mehr goend denn no chorz zo de Tante Martina of Bsuech. Sie muess deheime legge wägem Bebe. Sie sengt mer Liedli vor ond de Papi cha e chli Liedli heinäh zom Senge ond zom Brenne.

Ech darf hoet met em Mami id Bibliothek of Horb go. Det werd es Märli vom Schneema verzellt. Ech cha zwar ned ruhig hocke, doch mehr gfallts. denn darfi s'erscht Mol auch Buechli uslehne. Deheime muess i denn natürlich die aluege.

Am Nomitag chond d'Ayana of Bsuech. Sie wohnt grad nebedra. Mehr hend 2 Stond gspielt. Mehr send au vel of de Polstergruppe gomped. (Das ist mis Lieblingsspeli em Momänt) Wo de Papi hei esch cho semmer noch go ichaufe. Ech ha weder doere ganzi Pilatus Märt müesse sprenge. Ech be auch einisch omgheid ond ha weder e buele gha. Aber ech wot halt eifach ned lose, wenn s'Mami ond de Papi ruefid langsam. Mehr hend no det znacht gässe. Ech ha Chicken Nuggets ond Pommes gha met Apfelsaft.

Mehr goend am Morge i Bau ond Hoby. Det darf ech Bluemli foer d'Nonna uswähle. Ech darf au Bastelsache met em Mami heinäh. Mehr essid denn zmettag ond ech go go schloofe. S'Mami esch chorz wäg. So luegt de Papi zo mehr. Mer goend denn veruse i Garte ond luegid im Triibhus zum Rächte. Det chamer au schön dräcke ond es es schön warm denne. Gäge Obig goemmer denn zo de Nonna. Hoet esch Pizzaobig foer alli. Au ech esse e chli Pizza, doch lieber no Lyoner und Salami. Alli zäme send dete. Ech schloofe denn em Grosse Bettli met em Papi i ond mehr goend erscht gäge die 11i hei.

Ech luege interessiert zu, wie d'Nonna Pizza macht.

Ech wott scho am Morge früh ufstoh. Ech gseh d'Venus dosse. Mer goend denn am Morgen noch em Zmorge (Ech ha es ganzes Joghurt gässe) of Horw of de Spelplatz. Ech tue ganz vel Ritiseile ond singe dezu rite rössly.

Am Nomittag god s'Mami med mehr go laufe. Sie nemmt de Bobycar met. Doch ech wot ned. So muess de Papi denn ues go hole met em Auto. Denn wot i aber glich ned is Auto ond mach es Wettrenne met em Papi sim Auto. Deheime spele mer no dosse e chli. Ech go go Schneeglöckli foers Grosi go hole ond brenge sie ehre.